Kryeministri Zoran Zaev thotë se pushteti do të bëjë gjithçka që zgjedhjet presidenciale të jenë demokratike dhe të pastra si kristali, sepse, siç potencon, kandidati i tyre është favorit i madh dhe dëshirojnë që ai të fitojë në një palë zgjedhje të tilla.
Roli favorizues, siç tha në emisionin “Vetëm e vërteta” në TV Kanal 5, del nga ajo që Stevo Pendarovski qëndron shumë mirë edhe tek maqedonasit, por edhe tek shqiptarët, turqit, boshnjakët dhe bashkësitë e tjera etnike në vend, por, edhe për shkak se prapa kandidaturës së tij qëndruan 31 parti politike.
“Si favoritë, qëllimi, dëshira dhe detyrë e jonë është të fitojmë në zgjedhje të pastra si kristali dhe të mos ketë asnjë troshkë dyshimi. Duhet të kemi president i cili do të jetë president i të gjithë qytetarëve pa dallim nëse kanë votuar për të apo kundër tij dhe pa dallim të përkatësisë etnike”, tha kryeministri Zaev.
Duke u përgjigjur në pyetjen nëse beteja kryesore mes kandidatëve do të zhvillohet rreth çështjes së mbështetjes së Marrëveshjes së Prespës dhe ndryshimit të emrit, ai tha se kjo është një çështje e cila do të ndikojë në vendimin, sepse kandidatja e cila mbështetet nga VMRO, profesoresha Gordana Siljanovska Davkova dhe Pendarovski kanë qëndrime tërësisht të ndryshme.
Ai tha se Siljanovska-Davkova nuk e respekton Kushtetutën dhe se kjo nuk është në rregull nga ana e saj.
“Ne kemi Kushtetutë të re. Kushtetuta është akti më i lartë juridik që duhet ta respektojmë, t’i përkulemi dhe fund. Kjo është kjo. ka pasur shumë vendime që i ka sjellë shteti, dikujt ato i kanë pëlqyer shumë, dikujt jo, por ato duhet të respektohen”, tha Zaev.
