Policia izraelite përsëri bastis kompleksin e Xhamisë Al-Aksa
Tensionet në territoret palestineze janë rritur që kur forcat izraelite bastisën kompleksin Al-Aksa të premten, duke plagosur qindra besimtarë
Enes Canlı | 18.04.2022
Policia izraelite përsëri bastis kompleksin e Xhamisë Al-Aksa Foto: Mostafa Alkharouf / AA
Kuds
Policia izraelite bastisi përsëri kompleksin e Xhamisë Al-Aksa në Kudsin Lindor pas namazit të sabahut, raporton Anadolu Agency (AA).
Një numër i madh i pjesëtareve të policisë izraelite, të cilët hynë në oborrin e Xhamisë Al-Aksa, përdorën forcën për të larguar palestinezët nga ky vend i shenjtë.
Policia që shpërndau palestinezët mbylli portat e Al-Aksës për hyrjen e palestinezëve.
Pas kësaj, kolonët ekstremë hebrenj në grupe hynë në oborrin e Al-Aksës nën mbrojtjen e policisë izraelite.
Forcat izraelite kanë bllokuar hyrjet në Qytetin e Vjetër, ku ndodhet Xhamia Al-Aksa.
Prezenca intensive e policisë izraelite në portat e Qytetit të Vjetër dhe në rrugët anësore ka tërhequr një vëmendje të madhe.
Tensionet në territoret palestineze janë rritur që kur forcat izraelite bastisën kompleksin Al-Aksa të premten, duke plagosur qindra besimtarë.
Dje, më shumë se 700 kolonë hebrenj hynë me forcë në kompleksin e Al-Aksës nën mbrojtje të fortë policore për të kremtuar festën e Pashkëve hebraike, e cila filloi të premten.
