Pas ngjarjes tragjike sot, kur një pjesë e ndërtesës së Stacionit Hekurudhor në Novi Sad u shemb, duke lënë pas 14 viktima, presidenti i Serbisë, Aleksandar Vuçiç, shprehu ngushëllime për familjet e të ndjerëve. Në emër të gjithë qytetarëve serbë, ai u dërgoi ngushëllimet e tij familjeve dhe të afërmve të viktimave të aksidentit në Novi Sad.
“Na goditi një tragjedi e madhe. Në stacionin kryesor të trenave në Novi Sad, një pjesë e ndërtesës u shemb mbi një numër të madh njerëzish,” deklaroi presidenti Vuçiç. Ai shtoi se deri më tani identiteti i pesë viktimave mbetet i panjohur, tetë janë shtetas serbë, dhe një është nga Maqedonia. Vuçiç shprehu ngushëllime për familjet dhe të afërmit e viktimave dhe theksoi rëndësinë e unitetit për të ndihmuar familjet e tyre dhe për të minimizuar dëmet sa më shumë të jetë e mundur.
“Unë i kërkoj Prokurorisë së Lartë në Novi Sad që përgjegjësit për atë që ndodhi të ndiqen penalisht dhe të ndëshkohen ashpër. Mendoj se dikush do të japë përgjigje përse ajo tendë nuk ishte rikonstruktuar. Ata që e kanë projektuar dhe ndërtuar, si dhe ata që janë përgjegjës për infrastrukturën dhe sigurinë, duhet të japin llogari,” tha Vuçiç. Ai shtoi se kjo ngjarje tregon nevojën për inspektime të shpeshta të infrastrukturës në të ardhmen.
“Ende nuk e dimë emrin e vajzës së vogël, midis 6 dhe 7 vjeç, që humbi jetën; si mund ta justifikojmë këtë? Ata që janë përgjegjës, ju siguroj, do të ndëshkohen. Na mbetet vetëm të lutemi për shpirtrat e këtyre ëngjëjve të rënë dhe të reflektojmë për ndryshimet që duhet të bëjmë, si për veten, ashtu edhe për vendin tonë, për të shmangur tragjedi të tilla në të ardhmen,” tha Vuçiç. Në orën 11:50 u rrëzua çatia prej betoni në stacionin e Novi Sadit, njoftoi më parë Infrastruktura Hekurudhore e Serbisë.
