Banka australiane Commonwealth ka pranuar se ka humbur të dhënat bankare të rreth 20 milionë personave.Emrat, Adresat, anëtarët e llogarive dhe deklaratat ishin ruajtur në dy shirita mangnetikë, që duhej të shkatërroheshin nga një nënkontraktor në 2016.
Por, pavarësisht se nuk ka prova se shiritat janë shkatërruar, banka nuk i ka thënë klientëve se mund të ketë ndonjë problem për ta. Ky është skandali më i fundit në të cilin përfshihet huadhënësi më i madh në Australi.
Në një prezantim për bursën australiane, banka tha se nuk mund të konfirmonte se shiritat që mbanin 15 vite të dhëna ishin shkatërruar brenda rregullave. Por, ajo tha se një hetim i pavarur kishte dalë në përfundimin se skenari më i mundshëm është ai sipas të cilit, shiritat janë hequr qafe.
Banka sqaron se në shirita nuk kishte password-e, pine apo të dhëna të tjera që mund të përdoreshin për ndonjë vjedhje dhe nënvizoi po ashtu se nuk ka të dhëna që informacionet e klientëve mund të jenë kompromentuar.
Sidoqoftë, mekanizmat e monitorimit, sipas saj, mbeten në fuqi. Ishte Buzzfeed i pari që raportoi për humbjen e shiritave, duke pretenduar se ato duhet të shkatërroheshin nga Fuji Xerox pas nxjerrjes nga përdorimi nga ana e qendrës së të dhënave.
Sipas drejtuesve të bankës, incidenti është i papranueshëm dhe vetë shefi Angus Sullivan, kërkoi ndjesë për ndonjë shqetësim që mund ti ketë shkaktuar klientëve. Shkelja e privatësisë vjen në një kohë kur bankat australiane janë nën vëzhgim për shkak të një hetimi mbi bankat.
Muajin e kaluar u tha në kuadër të këtij hetimi se Commonwealth Bank kishte mbledhur tarifa nga klientë që e dinte se kishin vdekur. Në një rast, një këshilltar kishte mbledhur tarifa nga një ish-klient për më shumë se një dekadë. Sekretari i financave në Australi ka paralajmëruar se ekzekutivët financiarë mund të përballen me dënime të forta, përfshirë edhe dënimet me burg, nga provat e dala prej hetimit.
