Pesë punëtorë të hekurudhave janë goditur për vdekje nga një tren në pjesën veriperëndimore të Italisë, përderisa ishin duke e kryer punën e mirëmbajtjes së binarëve gjatë natës, raportuan mediat italiane të enjten.
Paolo Bodoni, kryetar i qytetit Brandizzo, afër Torinos, i tha agjencisë së lajmeve AGI se një punëtor i shërbimeve emergjente kishte thënë se skena ishte rrëqethëse dhe se mbetje të njerëzve ishin shpërndarë deri në 300 metra larg, raporton gazeta “The Guardian”.
“Kjo është një tragjedi e madhe”- tha Bodoni, duke shtuar se një hetim për këtë rast tashmë ka nisur.
Policia tha se treni me vagonë po lëvizte nëpër hekurudhën Torino – Milano dhe nuk ishte në shërbim komercial. Sipas autoriteteve, treni ishte duke lëvizur me shpejtësi prej 160 kilometrash në orë, kur i goditi punëtorët që ishin duke zëvendësuar pjesë të hekurudhës.
Dy kolegë, që ishin duke punuar afër tyre, arritën që të iknin, përfshirë kryepunëtorin.
RFI-ja, kompania që e menaxhon rrjetin hekurudhor të Italisë, e konfirmoi vdekjen e pesë punëtorëve përmes një deklarate dhe tha se një hetim është duke u zhvilluar.
