Arsimtari i gjuhës angleze që rrahu nxënësin në shkollën fillore “Panajot Ginovski” sot nuk ka shkuar në punë. Atë do ta zëvendësojë një arsimtar tjetër. Ai nuk është pushuar nga puna, por tani për tani nuk do të jep mësim, derisa pritet të shihet se çfarë do masa do të ndërmerre komisioni disiplinor pranë shkollës. Kështu informoi drejtoresha e kësaj shkolle Qamurane Rexha.
“Unë si drejtoreshë nuk mund të marrë vet vendimin për ta larguar nga puna. Kam formuar komision disiplinor me arsimtarët e shkollës, sindikatën dhe këshillin e prindërve. Ata do të japin mendimin e tyre pastaj do të vendoset për largimin e tij nga shkolla”, tha Qamurane Rexha – Drejtoreshë e SH.F “Panajot Ginovski”.
Drejtoresha informon se deri më tani nuk ka pasur ankesa kundër arsimtarit i cili mbi 13 vite vepron në këtë shkollë. Por si ndikon dhuna ndaj nxënësve në shkolla pyetëm sociologun Ali Pajaziti.
“Kjo dukuri që ka ndodhur në shkollë flet për një nivel të ulët pedagogjik të mësimdhënësit. Kjo ilustron krizën edukative që mbizotëron në hapësirën tonë arsimore. Kjo ka pasoja të veta siç janë ato psikologjike, sociale. Tek fëmija shkakton një ftohje ndaj procesit mësimor. Violenca normalisht shkakton distancim nga shkolla, distancim nga gjithë stafi që japin mësim në atë institucion. Shuplaka, grushti, shkopi, dhe të gjitta masat fizike për disiplinim të fëmijëve nuk janë legjitime dhe nuk janë zgjidhje në një mjedis shkollor”, deklaroi sociologu, Ali Pajaziti.
Nga Ministria e Punëve të Brendshme thonë se janë realizuar bisedime me persona që lidhen me rastin dhe se pritet që prokurori publik të dorëzojë parashtresë përkatëse deri te Prokuroria kompetente.
“Në lidhje me rastin në Shkollën “Panajot Ginovski” ju njoftojmë se pas sigurimit të denoncimit janë ndërmarrë masat e domosdoshme dhe aktivitete për zbardhjen e rastit, është kryer bisedë me persona që lidhen me rastin dhe me udhëzim të prokurorit publik do të dorëzohet parashtresë përkatëse deri te prokuroria kompetente”, thonë nga MPB-ja.
Sociologët apelojnë se aty ku edhe bëhet edukimi I fëmijëve, pra në shkolla, nuk guxon të mbizotëron dhuna. Ndryshe ditë më parë një video e publikuar në rrjetin social “Tik Tok” tronditi publikun, pasi në të u shfaqe një mësimdhënës teksa brutalisht rrah një nxënës në orë të mësimit dhe në prani të nxënësve të tjerë.
