Kryeministri Zoran Zaev, ka njoftuar se të hënën do të takojë krerët e dy partive opozitare shqiptare, Ziadin Selën dhe Afrim Gashin.
Zaev pret që në këtë takim të arrihet marrëveshje në lidhje me Ligjin për Shtetësinë.
Kryeministri gjithashtu tha se si Qeveri janë të gatshëm të diskutojnë për kërkesat e partive opozitare shqiptare.
“T’i japim mundësi takimit të hënën të gjejmë zgjidhje dhe është radha që kërkuesi i këtij takimi, Aleanca për Shqiptarët dhe Alternativa ti kumtojnë në fund edhe zgjidhjet dhe ne të dalim me ata dhe të themi se çfarë është ajo për çka është arritur marrëveshje”.
“Pra pres që të gjindet zgjidhje duke i ditur të gjitha detajet e analizave, pas takimit të punës që patëm me ministrin dhe zëvendës ministrin e punëve të brendshme, në takimin e ardhshme mendoj se zgjidhja është e pritshme që të hënën do të duhej të bëhet publike për opinionin”, u shpreh Zaev.
Ndryshe, për shkak të mospranimit të propozimit të tyre për Ligjin për Shtetësinë, Aleanca për Shqiptarët dhe Alternativa vendosën të bllokojnë çdo ligj në Kuvend, duke dorëzuar mijëra amendamente.
Aleanca për Shqiptarët dhe Alternativa ishin të vetmet që kundërshtuan shtyrjen e procesit të regjistrimit, i cili u anulua për në muajin shtator.
