Nga burime të konfirmuara nga Alternativa, marrim vesh se, gjatë vikendit, sekretari i përgjithshëm i Alternativës, Zeqirija Ibrahimi, është takuar me nënkryetarin e BDI-së, Izet Mexhiti.
Temë e këtij takimi ka qenë gjendja e shumicës parlamentare dhe ndryshimet që mund të ndodhin me inkuadrimin e Aleancës për Shqiptarët në qeverinë e Republikës së Maqedonisë së Veriut.
Me këtë rast Ibrahimi ka ritheksuar se nëse futja e ASH-së nuk e ka arsyen e krijimit të numrit të 80 deputetëve për ndryshimet e nevojshme kushtetuese, atëherë kjo ka kuptim vetëm që të shpëtohet jeta politike e partisë që ka humbje të deputetëve, duke aluduar në BDI-në.
Edhe Izet Mexhiti është shprehur se Artan Grubi insiston për futjen e ASH-së në qeveri, që kështu ta ndalojë mendimin ndryshe nga ai dhe bashkëmendimtarët e tij brenda BDI-së. Sipas tij, sot karriera politike e Grubit varet nëse atë e shpëton Arben Taravari apo jo.
Tashmë e dimë se Alternativa është shprehur që nuk ka gatishmëri të bëjë kompromise të reja nga marrëveshja Zaev-Gashi më 2021, ashtu që zhvillimet politike sa vijnë e ndërlikohen. Kur kësaj i shtohen edhe mospajtimet e ish kryeministrit Zaev me kreun aktual të LSDM-së rreth idesë së një qeverie LSDM-VMRO, duke e ditur gjithnjë ndikimin e tij te deputetët aktualë të LSDM-së, rritet mundësia që edhe nëse Aleanca për Shqiptarët pranon të bëhet pjesë e qeverisë, kjo të mos jetë e mjaftueshme për të formuar shumicë të mjaftueshme në parlament dhe vendi të shkojë në zgjedhje.
Gjatë kësaj jave do të zgjidhen këto dilema.
