Sipas Institutit për shëndetësi publike në Maqedoni, numër më të madh të qytetarëve të infektuar me Covid19 për kokë banori ka në Kumanovë, e dyta është Dibra, e pastaj vijnë Prilepi, Struga, Velesi, Shtipi, Koçani dhe Shkupi.
Ndërkaq në 9 qytete dhe qyteza në Maqedoni ende nuk është shënuar asnjë i infektuar, edhe atë në: Negotinë, Kratovë, Probishtip, Dojran, Sveti Nikollë, Berovë, Vinicë, Dellçevë dhe Pehçevë.
Lidhur me përkatësinë gjinore, deri dje janë të infektuar 465 meshkuj dhe 509 femra. Vdekshmëria te meshkujt në Maqedoni është 44,9/100.000, kurse te femrat 49,3/100.000.
Kjo është karakteristikë për Maqedoninë, sepse në nivel botëror meshkujt janë më të goditur nga Covid19, kurse në Maqedoni femrat edhe sa i përket numrit të pacientëve të infektuar edhe numrit të viktimave.
Mosha e të infektuarve në Maqedoni shkon nga 0 deri në 91 vjet, (mesatarja – 46 vite). Numri më i madh i të infektuarve është në moshë 50-59 vjeçare – 212 (21,8%). Te personat e moshës mbi 60 vjeçare janë regjistruar 207 raste. Përqindje më e vogël e pacientëve të infektuar me Covid 19 shënohet te grupmoshat e fëmijëve 0-9 dhe 10-19 vjeç.
Deri tani janë regjistruar 45 viktima nga Covid 19. prej tyre numri më i madh është mbi 60 vjeç. Te 73 për qind e tyre janë regjistruar edhe sëmundje tjera (komorbiditete).
