Nga e shtuna, Islanda do të heqë të gjitha kufizimet anti-covid, duke u bërë kështu vendi i parë evropian që merr një hap të tillë.
Ministrja e Shëndetësisë, Svandís Svavarsdóttir bëri të ditur sot se nga e shtuna islandezët nuk do të jenë më të detyruar që të mbajnë distancë sociale apo të vendosin maska.
Vendi ka në fuqi një sistem të mirë testimi dhe gjurmimi dhe i ka shtrënguar masat deri më tani për të frenuar rritjen e rasteve.
Veç maskës, tashmë hiqet edhe kufizimi i numrit për grumbullime apo mbajta e distancës prej dy metrash. Të paktën 87 për qind të islandezëve e kanë marrë dozën e parë të vaksinës për Covid-19.
Islanda, e cila ka një popullsi prej vetëm 360,000 banorësh, ka një incidencë infektimesh prej 1.6 për 100,000 banorë në një mesatare dyjavore.
