Policia federale gjermane në Rosenheim, të enjten ka vendosur prapa grilave një kontrabandist të drogës nga Maqedonia e Veriut. Shtetasi i Maqedonisë së Veriut ishte dënuar me një burgim të gjatë në vitin 2006. Tani, ai duhet ta ndërpresë udhëtimin e tij për në Gjermani për më shumë se katër vite e gjysmë.
Në postin e kontrollit kufitar afër Kiefersfelden, policia federale gjermane ndaloi një veturë me autotarga italiane. Kur u kontrolluan të dhënat personale të pasagjerit, kompjuteri i kërkimit lëshoi alarmin, informon Shtegu.com. Verimaqedonasi ishte përfshirë në disa tregti të drogës. Më shumë se 14 vite më parë, Gjykata e rrethit në Duisburg e kishte dënuar me dymbëdhjetë vite burg për trafik droge në disa raste. Pasi 59-vjeçari kishte vuajtur një pjesë të dënimit, ai ishte dëbuar në vendin e tij.
Për shkak të kthimit të tij në Gjermani, ai duhet të shkojë sërish në burg edhe për 1,654 ditë të tjera. Policia federale gjermane arrestoi verimaqedonasin dhe e dërgoi në institucionin korrektues të Traunsteinit. Atje ai do të duhet të vuajë dënimin e tij të mbetur për më shumë se katër vite e gjysmë.
