Greqia të hënën nënshkroi një marrëveshje për të blerë 18 avionë luftarakë Rafale nga Franca, duke vendosur më tej një partneritet me Parisin në një atmosferë tensioni me Turqinë.
Shuma e transaksionit është rreth 2.5 miliardë euro dhe përfshin dorëzimin e 12 avionëve të përdorur Rafale të Forcës Ajrore Franceze dhe gjashtë Rafale të rinj të prodhuar nga Dassault Aviation.
Duke cituar një partneritet intensiv operativ me Athinën, ministrja Franceze e Mbrojtjes Florence Parly shkoi në Athinë për të nënshkruar marrëveshjen dhe përshëndeti “suksesin e rëndësishëm” për Rafale.
Franca doli në krah të Athinës
Vendimi për të negociuar u mor në shtator nga kryeministri grek Kiriakos Mitsotakis, në përgjigje të kërkimit të gazit nga Turqia dhe “demonstrimit të forcës” në ujërat e diskutueshme të Mesdheut.
Në muajt e fundit, Franca ka dalë në krah të Athinës duke dërguar Rafale dhe anije luftarake gjatë verës pas vendosjes së anijeve ushtarake dhe kërkimore turke në zonën e pretenduar nga Greqia.
Dorëzimet e avionëve luftarakë Rafale duhet të fillojnë në korrik.
“Pilotët dhe teknikët e parë të aviacionit ushtarak grek do të shkojnë në Francë për trajnim në ditët në vijim,” tha zëdhënësi i qeverisë greke Christos Tarantilis.
Nga ana tjetër, lëvizje të tilla psikologjike nga Greqia nuk ka patur asnjë ndikim te Turqia. Me një superioritet ushtarak shumë më të fuqishëm, si forcë e tretë e NATO-s, Ankaraja e sheh zgjidhjen në uljen e palës greke në tryezën e bisedimeve.
