Shtetet e Bashkuara kanë rrëzuar një balonë të dyshuar spiune kineze që ka fluturuar mbi hapësirën e saj ajrore.
Presidenti amerikan, Joe Biden, e ka konfirmuar aksionin, duke thënë se balona “u rrëzua suksesshëm” dhe i komplimentoi pilotët për aksionin.
Pamjet televizive treguan një shpërthim të vogël, duke e bërë balonën që zbriste drejt ujit – në brigjet e Karolinës, raporton SkyNews.
Balona u rrëzua nga një avion luftarak i Forcave Ajrore, pasi avionët ushtarakë amerikanë u panë duke fluturuar në afërsi.
Anijet ishin vendosur gjithashtu në ujë për të kryer operacionin e rikuperimit.
Zyrtarët synonin të caktonin kohën e operacionit në mënyrë që të mund të rikuperonin sa më shumë mbetje që të ishte e mundur përpara se të fundoseshin në oqean.
Presidenti Joe Biden kishte paralajmëruar se SHBA-ja “do të kujdeset” për fluturaken, pasi ajo u pa përsëri të shtunën – këtë herë mbi Karolinën e Veriut.
Shtetet e Bashkuara kishin hezituar më parë të gjuanin balonën për shkak të rreziqeve për njerëzit në tokë nga rënia e mbetjeve.
Përpara operacionit, fluturimet u pezulluan në disa aeroporte.
Zbulimi i balonës ka nxitur tensione dhe një grindje diplomatike midis Kinës dhe SHBA-së.
SHBA pretendon se anija është një balonë e dyshuar spiune dhe thotë se ka kryer një “shkelje të qartë” të sovranitetit të saj.
Kina këmbënguli se përdoret për kërkime meteorologjike dhe kërkime të tjera shkencore dhe ishte hedhur në erë.
Objekti besohet të ketë fluturuar mbi Ishujt Aleutian, në brigjet e Alaskës dhe përmes Kanadasë përpara se të hynte në SHBA në fillim të kësaj jave.
Ai funksionon në 60,000 këmbë dhe është i manovrueshëm, ka thënë Pentagoni.
