Ambasadorja e Shteteve të Bashkuara të Amerikës në Shqipëri, Yuri Kim, e cila doli për të parë nga afër funksionimin e pajisjes së identifikimit biometrik të votuesve, nga Shkodra u ka bërë thirrje qytetarëve shqiptarë që të votojnë të lirë jashtë çdo ndërhyrjeje.
Ajo theksoi se SHBA-ja inkurajon qytetarët shqiptarë që të ushtrojnë në mënyrë të lirë vullnetin e tyre përmes votës.
“SHBA-ja nuk mbështet një parti politike apo një kandidat të caktuar politik, por ne mbështesim të drejtën e qytetarëve për të votuar. Shpresojmë që çdo qytetar shqiptar të ketë mundësinë që të shkojë të votojë i lirë dhe larg çdo ndërhyrjeje. Kjo është dita juaj”, tha ambasadorja Yuri Kim.
Edhe ambasadori i Bashkimit Evropian në Shqipëri, Luigi Soreca i është drejtuar qytetarëve shqiptarë mëngjesin e së dielës ku ju kërkoi të marrin pjesë në zgjedhjet e përgjithshme të 25 prillit.
“Më 25 prill është fuqia juaj demokratike për të hedhur votën të lirë dhe me integritet. Kjo është mënyra se si ju tregoni se kujdeseni për komunitetin, familjen dhe të ardhmen. Kjo votë është juaja, askush nuk mund ta marrë prej jush. BE-ja qëndron përkrah Shqipërisë në ditën e zgjedhjeve. Ti vendos!”, shkruan Soreca.
Përfaqësuesit e misioneve diplomatike dhe ambasadorët e huaj në Shqipëri kanë qenë të zëshëm gjatë gjithë fushatës të zhvilluar në Shqipëri muajin e fundit.
Ata ju kanë bërë thirrje qytetarëve të Shqipërisë që të ushtrojnë të drejtën e tyre për të votuar dhe të mbrojnë votën e tyre.
“Ushtroni të drejtën tuaj, mos e shisni votën”, kanë thënë ata në mesazhe të shpërndara në rrjetet sociale, ku njëkohësisht kanë theksuar se “demokracia është e paçmueshme”.
Në zgjedhjet e 25 prillit, të drejtë vote kanë 3.6 milionë qytetarë. Zgjedhjet e fundit parlamentare që janë mbajtur në Shqipëri, ishin ato të vitit 2017, ku është regjistruar edhe pjesëmarrja më e ulët historike në zgjedhjet për Kuvendin që nga viti 1991, me 46.76% e qytetarëve që kanë marrë pjesë në këtë proces.
