Eksperti amerikan dhe njohësi i rrethanave politike në Ballkanin Perëndimor, Daniel Serwer, thotë se kjo verë do të jetë vendimtare për shtetin e Kosovës. Serwer në një diskutim me një panel të Universitetit të Kolumbisë, ku ishte i pranishëm edhe David Philips, ka folur rreth të ardhmes së Kosovës.
Serwer në këtë diskutim ka thënë se administrata aktuale e Trumpit ka braktisur politikën tradicionale të Amerikës karshi Ballkanit Perëndimor dhe veçanërisht Republikën e Kosovës, duke u bërë partner me Serbinë.
“Gjëja kryesore për të kuptuar është se amerikanët e kanë braktisur politikën e vendosur mirë në Ballkan në veçanti për Kosovën. Politika e vendosur në Ballkan kishte tre shtylla: Mbrojtja e popullatës së Kosovës dhe simpatia për aspiratat e pavarësisë së Kosovës, si dhe përkushtimi ndaj sovranitetit të Bosnjës; Mbështetje për demokracinë liberale në të gjithë Ballkanin; dhe angazhim për të vepruar në të njëjtën kohë me evropianët, veçanërisht me Gjermaninë dhe Mbretërinë e Bashkuar”, ka thënë Serwer.
“Më në fund, është shumë e qartë që Beogradi, jo Sarajeva ose Prishtina, është sot partneri i preferuar i Ballkanit në Uashington”, ka shtuar tutje ai.
Serweri thotë se emisari i Trumpit, Richard Grenell, është duke shtyrë përpara një marrëveshje përmes korrigjimit të kufijve dhe, sipas tij, është fatkeqësi që edhe Përfaqësuesi i Lartë i BE-së, Josep Borell, tani për temën e kufijve ka të njëjtin qëndrim sikurse paraardhësja Federica Mogherini.
Megjithatë, Serwer thotë se shmangia e ndarjes së Kosovës mund të evitohet deri më 1 tetor meqë s’ka ndodhur akoma. Sipas tij, një vendim i Gjykatës Kushtetuese që do të vendoste kundër krijimit të një qeverie të re pa zgjedhje të reja do të ishte një vonesë e mirëseardhur.
Derisa tutje ai ka përmendur edhe zgjedhjet presidenciale që do të mbahen në Shtetet e Bashkuara të Amerikës dhe shpresës që Joe Biden mund t’i fitojë ato.
“Një administratë e Biden duhet të mbyllë derën në shkëmbimet e tokës, me zë të lartë”, ka thënë Serwer.
Ndërsa, thotë ai se nëse Trump fiton një mandat të dytë atëherë presioni për arritjen e një marrëveshjeje të shpejtë do të zbehej, edhe pse Serweri përsëri thotë se Richard Grenell do të ndiqte edhe më tej idenë e shkëmbimit të territoreve mes Kosovës dhe Serbisë.
Në fund, Serwer ka thënë se muajt e ardhshëm do të jenë jetikë dhe vendimtarë për të ardhmen e Republikës së Kosovës.
