Liderët e 27 vendeve të Bashkimit Evropian të premten mbajtën një takim të veçantë në Bruksel. Në ditën e dytë të samitit në Bruksel, sikur në të parën (të enjten) ku ishin prezentë edhe krerët e vendeve të Ballkanit Perëndimor disa nga udhëheqësit evropianë dhanë zotime të mëdha për mysafirët e një dite më parë.
“Unë i kam veçanërisht afër zemrës gjashtë vendet e Ballkanit Perëndimor. Është e rëndësishme që ne të shfrytëzojmë dinamikën e re, e cila do t’i japë atyre forcë të re që të marrin perspektivën e tyre dhe që në të vërtetë të bëhen anëtarë të Bashkimit Evropian”, tha kancelari i Gjermanisë, Olaf Scholz. Angazhimi i plotë dhe i qartë i BE-së për perspektivën e anëtarësimit të gjashtë vendeve u theksua në përfundimet që u nxorën nga takimi euro-ballkanik.
Kosova në klauzolat, që u bënë publike të enjten mbrëma, përmendet në pikën 19, ku Këshilli Evropian ripohon urgjencën e arritjes së përparimit të prekshëm në zgjidhjen e mosmarrëveshjeve të pazgjidhura dypalëshe dhe rajonale, veçanërisht në dialogun për normalizimin e marrëdhënieve ndërmjet Kosovës dhe Serbisë.
Zotim politik nuk pati për procesin që kosovarët presin qe shumë vite, liberalizimin e vizave.
Profesoresha e integrimeve evropiane, Jehona Lushaku-Sadriu, thotë se kjo është një qasje që e “favorizon dialogun me Beogradin më shumë sesa heqjen e regjimit të vizave”.
Nga ana e saj presidentja Vjosa Osmani, që përfaqësoi Kosovën në samitin e 23 qershorit, tha se u dhanë sinjale të forta për liberalizim dhe integrim të shtetit në BE, madje edhe nga vendet që ishin skeptike sidomos për lëvizjen e lirë. Por, sipas Osmanit, tani është koha që vendet anëtare të unionit të kalojnë nga “fjalët në vepra”.
