Ka zgjatur rreth 11 orë vizita e Presidentit turk Rexhep Taip Erdogan në Shqipëri. Ai është përcjellë në aeroportin e Rinasit nga kryeministri Edi Rama dhe i gjithë kabineti qeveritar.
Në fund mes dy liderëve pati një përqafim.
“Shumë të fala zonjës dhe të gjithë familjes”, u shpreh Rama, ndërsa në Facebook ka shkruar “Faleminderit” në gjuhën shqipe dhe turke.
“Edhe ju gjithë të falat edhe zonjës edhe fëmijëve. Do të takohemi përsëri”, u përgjigj Erdogan.
Presidenti turk vizitoi sot Shqipërinë. Fillimisht, kreu i shtetit turk shkoi në Laç për t’u dorëzuar banorëve çelësat e banesave të reja të rindërtuara pas tërmetit të 26 Nëntorit nga Turqia. Më pas, ai zhvilloi një takim me Ramën në kryeministri.
Kjo u pasua me fjalën përshëndetëse të Erdogan në Kuvend. Aktiviteti që përmbylli vizitën zyrtare të Erdogan në Shqipëri ishte inaugurimi i xhamisë së Et’hem Beut në Tiranë, një xhami e restauruar nga agjencia turke, TIKA./tvklan.al
