“E rritëm pagën minimale nga 9.000 në 15.000 denarë. Deri në fund të vitit do të jetë 18.000 denarë, nga 9.000 në 18.000, kjo është rritje prej 100%”, tha Zoran Zaev, ish kryeministër. (06.10.2021)
-LSM-ja paralajmëron protesta për më 12.12 shkaku i rrogës minimale, e cila siç paralajmëruat do të jetë 18.000 denarë?
“Sa i takon rrogës minimale, patjetër do të bëhet në fillim të vitit që vjen, vetëm nëse nuk e bllokojnë këta nga VMRO-ja“, tha Kreshnik Bekteshi, ministër i Ekonomisë.
Kërkesa e punëtorëve nuk dallon nga ajo që premtonin politikanët e pushtetit gjatë zgjedhjeve. Por, as dje nuk u arrit marrëveshje mes punëdhënësve dhe punëtorëve që rroga minimale të jetë 300 euro. Sipas LSM-së, për Qeverinë ishte i pranueshëm modeli që e propozuan, andaj i bëjnë thirrje që më me guxim të qëndrojë në anën e punëtorëve. Nga Organizata e Punëdhënësve kërkojnë në qoftë se paga minimale rritet, atëherë një pjesë të mbështetet nga Qeveria.
“As sot nuk ka marrëveshje. Është evidente se punëdhënësit kujdesen vetëm për firmat e tyre dhe kapitalin e tyre. Bile morën guxim që të kërkojnë para për veten që të mbijetojnë ata, kurse ne punëtorët mbetëm në mëshirën e fatit”, pohoi Darko Dimovski, kryetar i Lidhjes së Sindikatave të Maqedonisë.
“Projeksioni ynë parasheh kushte më të pranueshme afatgjata për të gjithë punëtorët, sesa kushtet që i ofron Sindikata. Sipas projeksionit tonë rroga minimale do të ishte mbi 16.300”, tha Vlladanka Trajkovska, kryetare e Organizatës së Punëdhënësve.
“Kishte përparim. Një nga konkluzionet e përbashkëta ishte se modeli ekzistues i harmonizimit të rrogës minimale nuk është i pranueshëm për asnjërën palë, as për Sindikatën, as për Organizatën e Punëdhënësve, e bile as për Qeverinë sepse ky model nuk garanton rritje dinjitoze të pagës minimale, nuk i plotëson nevojat reale të punëdhënësve dhe ne e refuzojmë atë”, pohoi Fatmir Bytyqi, zëvendëskryeministër.
Edhe pas tre takimeve, nuk është gjetur gjuhë e përbashkët dhe marrëveshje. Nëse më 10 shkurt propozim-ligji për rrogë minimale nuk kalon në Kuvend, nga Lidhja e Sindikatave paralajmërojnë protesta në mbarë vendin, ndërsa bordet e grevës tashmë janë bërë gati.
