Turqia ka vendosur të mos marrë pjesë në stërvitjet e NATO-s në Greqi, duke akuzuar Athinën për ndryshimin e ndarjes së hapësirës ajrore midis dy vendeve. Ushtrimet e quajtura “Takim me Tigrin” mbahen çdo vit në vende të ndryshme për të theksuar solidaritetin e vendeve pjesëmarrëse.
Këtë herë ato janë planifikuar të zhvillohen në Greqi nga data 9 deri më 20 maj. Sipas mediave turke, Greqia, e cila si vend pritës ka hartuar rregulloret teknike për zbatimin e masave përpara çdo stërvitjeje, ka shtuar shtesa “anti-Turqi” që “manipulojnë” kufijtë, veçanërisht hapësirën ajrore mbi Egje.
Komanda e Forcave Ajrore Turke kërkoi ndryshimin e rregulloreve teknike, por kërkesat e Turqisë nuk u pranuan nga Greqia. Pas kësaj, Forcat Ajrore Turke refuzuan të marrin pjesë në stërvitje dhe ia kaluan këtë informacion Athinës zyrtare. Greqia dhe Turqia kanë debatuar prej kohësh për kufijtë detarë dhe ajrorë. Athina zyrtare e akuzon rregullisht Ankaranë për shkelje të hapësirës së saj ajrore.
