Bllokada autostradash, kolona makinash dhe bllokime trafiku. Në Gjermani dita nisi me protesta të fermerëve që kundërshtojnë heqjen e subvencioneve. Gjatë gjithë kohës policia është në gatishmëri.
Sot, pothuajse një pjesë e madhe e Gjermanisë nuk do të funksionojë normalisht. Do të ketë mijëra traktorë në rrugë – në një protestë që fermerët gjermanë po e shpallin si më të madhin në histori.
Tabloidi Bild publikoi një hartë të qyteteve dhe autostradave, bllokadat e të cilave po shpallen – lista është e gjatë. Autoritetet u bënë thirrje qytetarëve që të përdorin transportin hekurudhor dhe të heqin dorë nga drejtimi. Punëdhënësit u thonë njerëzve që të punojnë nga shtëpia aty ku është e mundur, dhe shkollat do të justifikojnë mungesat e fëmijëve.
Në disa video shihet se si policia me mjetet e saj tenton të bllokojë rrugën e traktorëve, por ata dalin nga rruga dhe kalojnë lehtësisht bllokadat e policisë nëpër fusha.
“Shumë veprime jo vetëm që janë të pajustifikuara ligjërisht, por ndonjëherë paraqesin kërcënim për trafikun, sigurinë publike dhe rendin”, kritikon sindikata e policisë.
Pasi Gjykata Kushtetuese e ndaloi qeverinë federale të bënte borxhe të reja dhe të fuste disa shpenzime në buxhetin e vitit 2024, në arkën e shtetit u krijua një vrimë prej 17 miliardë eurosh.
Vetëm pak ditë më parë, u arrit një kompromis për buxhetin e ri në qeverinë e koalicionit të përbërë nga tre parti – Social Demokratët (SPD), Të Gjelbrit dhe Liberalët (FDP). Me këtë shfuqizohen subvencionet e ndryshme, të cilat do të sjellin rritje të ndjeshme të çmimit të benzinës dhe të naftës, të energjisë elektrike dhe të ngrohjes. U hoqën edhe subvencionet për makinat elektrike, si dhe u ul ritmi i shumë investimeve.
Sa i përket prodhuesve bujqësorë, subvencionet për naftën janë hequr, si dhe është vendosur taksë për të gjitha automjetet bujqësore, si dhe për automjetet e pasagjerëve, në varësi të fuqisë së motorit dhe konsumit të karburantit.
Traktorët e rëndë dhe makineritë bujqësore konsumojnë sasi të mëdha nafte dhe kanë motorë me fuqi të lartë. Fermerët gjermanë besojnë se mjetet e tyre nuk duhet të trajtohen njësoj si makinat private.
Kjo është arsyeja pse fermerët e zemëruar kanë bërë thirrje për një bllokadë mbarëkombëtare. Qeveria e frikësuar u zbut menjëherë disi, hoqi dorë nga taksa për makineritë bujqësore dhe premtoi rikthim gradual të subvencioneve të karburanteve, por fermerët nuk u kënaqën me këtë.
