Me marsh të shkurtër protestues dhe me tubim para selisë së HEC Mavrovë, një grup qytetarësh të Gostivarit shprehën pakënaqësi kundër vendimit për shtrenjtimin e energjisë elektrike. Organizatorët e protestës, grupi i tifozëve “Kastrioti”, protestën e gjashtë e filluan nga qendra energjetike e konsumatorëve të EVN-së në Gostivar.
Në tubimin protestues para drejtorisë së HEC Mavrovë u lexuan kërkesat: Komisioni Rregullator për Energjetikë ta asgjësojë vendimin për rritjen e çmimit të energjisë elektrike për 7,4 për qind, të ulet çmimi i energjisë elektrike për 20 për qind, ndërsa nga Qeveria kërkohet ta zvogëlojë TVSH-në e energjisë elektrike prej 18 në 5 për qind dhe ta ndërpresë monopolin e kompanisë private EVN.
Nga Këshilli organizativ që i organizon protestat kërkojnë nga KRRE dhe Qeveria t’i kuptojnë protestat në mënyrë serioze dhe shpejtë të gjendet zgjidhja më e mirë e mundshme.
“Në të kundërt, nuk na ngelet asgjë tjetër përveç të dëshmojmë padëgjueshmëri qytetare. Mos na detyroni ta përsërisim vitin 2001. Por jo me konfliktin e armatosur por me mospagesën e faturave”, tha Sali Jonuzi në tubim. Ai theksoi se është e papranueshme të paguhet çmimi më i lartë i energjisë elektrike në rajon ndërsa të kemi pagat më të ulëta.
Tubimi dhe dy objektet janë siguruar nga forcat policore dhe kaloi pa incidente. Tubimin e karakterizoi edhe një gjest i pazakontë. Disa fëmijë policëve të cilët ishin me mburoja u dhanë nga një lule në shenjë të vullnetit të mirë dhe mesazhit për mospasje të dhunës.
