Profesorët e njohur Avzi Mustafa dhe Afrim Osmani janë nderuar me çmimin shtetëror “22 Nëntori” për vitin 2024, një nga çmimet më të larta që jepet në Maqedoninë e Veriut. Ky çmim u akordohet individëve të shquar që kanë kontribuar në avancimin e bashkëjetesës dhe mirëkuptimit midis komuniteteve të ndryshme, kulturave dhe feve në vend shkruan Pa Censurë.
Profesor dr. Avzi Mustafa, pedagog, dhe profesor dr. Afrim Osmani, profesor universitar, janë vlerësuar për kontributin e tyre të shquar në fushën politike, kulturore dhe shoqërore. Përmes punës së tyre, ata kanë ndihmuar në krijimin e një mjedisi të bashkëjetesës dhe respektit të ndërsjellë midis grupeve të ndryshme etnike dhe fetare në Maqedoninë e Veriut.
Vendimi për dhënien e çmimit “22 Nëntori” u miratua më 16 tetor 2024 nga Komiteti për Dhënien e Çmimeve Shtetërore, ndërsa sot u publikua në “Gazetën Zyrtare të Republikës së Maqedonisë së Veriut”. Kryetari i komitetit, Reshat Ameti, nënshkroi vendimin, duke njohur rëndësinë e arritjeve të këtyre dy figurave në ndërtimin e një shoqërie të harmonizuar dhe gjithëpërfshirëse.
Çmimi “22 Nëntori” është një nderim i veçantë që i kushtohet përpjekjeve për një Maqedoni të Veriut të bashkuar dhe të fuqizuar përmes diversitetit të saj.
