Policia greke ka hedhur gaz lotsjellës në drejtim të migrantëve, që janë mbledhur në kufirin Greqi-Turqi dhe po kërkojnë që të futen në territorin grek.
Qeveria greke ka ripërsëritur zotimin e saj se do të ndalojë migrantët që të futen në shtet.
“Qeveria do të bëjë gjithçka që është e nevojshme për të mbrojtur kufijtë e saj”, tha zëdhënësi i qeverisë, Stelios Petsas, duke shtuar se në 24 orët e fundit, autoritetet greke kanë penguar kalimin ilegal të kufirit të 4 mijë personave.
Pamjet e publikuara nga televizioni grek Skai TV në kufirin me Turqinë, në Kastenies, shfaqën policinë greke duke hedhur gaz lotsjellës në drejtim të një grupi migrantësh, të cilët hodhën gur në drejtim të policëve grekë.
Një zyrtar i Qeverisë turke ka deklaruar më 27 shkurt se Turqia nuk do të ndalojë qindra mijëra migrantë, pas sulme ajrore në Idlib, ku u vranë 33 ushtarë turq. Pothuajse menjëherë pas këtij njoftimi, konvoje me mirgrantë u nisën drejt territorit grek.
Sipas një zyrtari të Qeverisë greke, rreth 3 mijë persona gjenden në pikëkalimin kufitar në Kastenies.
Greqia, që ka qenë rruga kryesore për qindra mijëra migrantë më 2015-2016, që dëshironin të arrinin në vendet evropiane, ka premtuar se nuk do të lejojë një fluks të ri me migrantë.
