Drejtoria për Hetimin e Krimeve Financiare ka dorëzuar një kallëzim penal në Prokurorinë Themelore të Shkupit kundër 8 funksionarëve për dyshimin e kryerjes së veprës penale Abuzimi me pozitën dhe autorizimet zyrtare sipas nenit 353, paragrafi 4 të Kodit Penal.
Prokuroria ka hapur një çështje dhe ka nisur procedura kundër këtyre 8 funksionarëve, të dyshuar për kryerjen e veprës penale si bashkëpunëtorë. Gjatë hetimit para-proceduror, të kryer nga Drejtoria për Hetimin e Krimeve Financiare në koordinim me Prokurorinë, janë siguruar prova që tregojnë se nga data 26.01 deri më 12.07.2022, i dyshuari kryesor, si drejtori i Drejtorisë për Zonat e Zhvillimit Teknologjik dhe Industrial në Shkup, së bashku me tre funksionarë të tjerë përgjegjës për kontrollin administrativ në Byrosin për Prokurime Publike dhe katër anëtarë të Komisionit Shtetëror për Ankesa në Prokurimet Publike, duke mos kryer detyrat e tyre zyrtare, mundësuan që një person juridik të përfitojë pasuri të paligjshme në vlerë të konsiderueshme prej 622.981.190 denarë.
I dyshuari kryesor, pas një vendimi të mëparshëm, kishte shpallur një tender për ndërtimin e infrastrukturës së brendshme për Zonat e Zhvillimit Teknologjik dhe Industrial në Shkup, Strumicë dhe Shtip.
Në shpalljen e publikuar, brenda afatit ligjor, kanë aplikuar dy operatorë ekonomikë që dorëzuan oferta sipas kritereve të parashikuara. Njëra nga kompanitë ka ofruar një çmim më të lartë, por një afat shumë më të shkurtër për përfundimin e punimeve në ditë kalendarike, dhe për këtë arsye u zgjodh si kontraktues.
Tre anëtarët e Byrosë për Prokurime Publike – Komisioni për Kryerjen e Kontrollit Administrativ, nuk kanë kryer detyrën e tyre zyrtare për kontrollimin e përmbushjes së kushteve të dokumentacionit të tenderit në lidhje me aftësitë teknike dhe profesionale për realizimin e punimeve të parashikuara, si dhe në lidhje me afatin e përfundimit të punimeve si kriter për cilësinë.
Ata nuk kanë vërejtur shkeljet dhe i kanë dërguar Drejtorisë për Zonat e Zhvillimit Teknologjik dhe Industrial të Shkupit një akt të kontrollit administrativ me mendimin se organi kontraktues mund të vazhdojë me procedurën për prokurimin publik.
Pjesëmarrësi i dytë në procedurë ka paraqitur ankesë në Komisionin Shtetëror për Ankesat në Prokurimet Publike, por atje, kryetari dhe tre anëtarët e tjerë e kanë injoruar gjetjen dhe mendimin profesional të ekspertit të fushës së ndërtimtarisë, i cili ishte baza e ankimit, dhe kanë marrë një vendim duke e refuzuar ankesën e operatorit tjetër ekonomik për arsye të pabazueshmërisë. Në këtë mënyrë, Drejtoria ka lidhur një kontratë me kompaninë e zgjedhur për ndërtimin e infrastrukturës së brendshme për Zonat e Zhvillimit Teknologjik dhe Industrial në Shtip dhe Strumicë, me afat për realizimin e punimeve prej 120 ditësh kalendarikë nga momenti i nisjes së punës.
Dy muaj pas fillimit të punimeve, i dyshuari, drejtor, ka nënshkruar një aneks-kontratë për të rritur vlerën e kontratës fillestare për 84.688.628 denarë, ose 19,77% të vlerës së kontratës fillestare dhe ka shtyrë afatin për realizimin e punimeve. Pas tre muajsh, ai ka nënshkruar edhe një aneks-kontratë tjetër, duke rritur vlerën e kontratës fillestare për 34.921.240 denarë dhe duke shtyrë për herë tjetër afatin e punimeve.
Kur firma nuk ka përmbushur afatin e dhënë prej 120 ditësh kalendarikë për përfundimin e punimeve, që ishte kushti kryesor për fitimin e tenderit, drejtor i dyshuar nuk ka marrë veprime zyrtare për të anuluar kontratën për prokurimin publik, për të aktivizuar garancitë bankare të paraqitura dhe për të kërkuar dënime kontraktuale për vonesat në realizimin e punimeve.
Me moskryerjen e detyrave të tyre zyrtare, të dyshuarit kanë kontribuar që personi juridik të fitojë prokurimin publik duke ofruar një afat shumë të ulët për përfundimin e punimeve, i cili nuk është realizuar, dhe me një çmim ndjeshëm më të lartë se konkurrenti i tij, duke mundësuar kështu që ky person juridik të përfitojë pasuri të paligjshme.
Për shkak se në këtë rast, të akuzuarit me veprimet e tyre kanë mundësuar që një person juridik të përfitojë pasuri të paligjshme të një vlerë të konsiderueshme, Drejtoria për Hetimin e Krimeve Financiare ka nisur një hetim financiar për të përcaktuar pasurinë me të cilën është pasuruar subjekti ligjor gjatë kohës së kryerjes së veprave penale. Gjatë hetimit është konstatuar pasuri e konsiderueshme dhe për këtë arsye është dërguar një njoftim në Prokurorinë Themelore të Shkupit për të ndërmarrë masa të përkohshme për sigurimin e saj.
Duke marrë parasysh informacionet nga institucionet financiare lidhur me gjendjen financiare të momentit, sipas të cilave subjekti juridik i përfaqësuar nga menaxheri i tij është përdoruesi përfundimtar i pasurisë të paligjshme të fituar nga veprat penale, prokurori kompetent ka paraqitur një kërkesë në Gjykatën Themelore të Shkupit për konfiskimin e përkohshëm të pasurisë dhe sendeve për t’i siguruar ato për konfiskim të ardhshëm.
Me masën e përkohshme, propozohet ngrirja – hipotekimi i pasurisë të paluajtshme në Karposh dhe Kisella Vodë, ndalim i disponimit me mjete nga katër llogari transaksioni (tre të individëve dhe një të subjektit juridik), si dhe ndalim i disponimit me listën e pasurisë të lëvizshme në pronësi të personit juridik (dy automjete pasagjerë, tetë automjete ngarkese, kipera dhe pajisje ndërtimi).
Përveç kësaj, me kërkesë të prokurorit, Gjykata i ka hequr pasaportën të dyshuarit, i cili në momentin e kryerjes së veprës penale ka mbajtur funksionin e drejtorit të Drejtorisë për Zonat e Zhvillimit Teknologjik dhe Industrial në Shkup.
