Me 52 milionë bileta të shitura 9 euro dhe rreth një miliardë udhëtime të kryera në muaj, kompanitë gjermane të transportit e kanë konsideruar kartën e udhëtimit veror me kosto të ulët një sukses të jashtëzakonshëm.
Bileta prej 9 eurosh, e cila u ka mundësuar gjermanëve të udhëtojnë me çmim buxhetor në gjithë transportin publik në Gjermani gjatë muajve të verës, qershor, korrik dhe gusht, do të përfundojë nesër, shkruan albinfo.ch.
Shoqata e Kompanive Gjermane të Transportit (VDV) raportoi se gjatë 3 muajve, 52 milionë bileta u shitën dhe e quajti nismën një “sukses të plotë”. Për më tepër, më shumë se 10 milionë njerëz që kishin tashmë karta transporti – të njohura si Abos në Gjermani – morën zbritjen automatikisht. Ndërkohë, rreth një miliard udhëtime kryheshin çdo muaj.
Si rezultat, VDV vlerëson se rreth 1.8 milionë tonë CO2 u kursyen gjatë periudhës së ofertës – duke pasur përafërsisht të njëjtin efekt sikur të kishte një kufizim shpejtësie në autostradat gjermane për një vit.
