Shtylla e identitetit tonë është gjuha jonë, pastaj historia, historia e përbashkët me bashkatdhetarët tanë, tha presidenti Stevo Pendarovski në një intervistë për “Euobserver”. Sipas Pendarovskit, nuk është sekret që gjuha maqedonase është kodifikuar në vitin 1945, por është një gjuhë e veçantë, e ngjashme me bullgarishten, por “nuk është dhe nuk ka qenë gjuhë bullgare”.
“Kodifikimi u realizua në fund të Luftës së Dytë Botërore kur u formua Republika Popullore e Maqedonisë si pjesë e Jugosllavisë. Më parë, territori ka qenë nën pushtetin e Bullgarisë, Serbisë dhe në të kaluarën nën pushtetin e Perandorisë Osmane. Edhe përkundër kësaj, njerëzit që kanë jetuar në këto vende gjithmonë kanë pasur identitetin e tyre etnik”, tha Pendarovski.
Sipas presidentit Pendarovski, pretendimi i Bullgarisë se e gjithë historia jonë deri në 1945 ka qenë bullgare dhe se gjithçka, nga shekulli i 10-të deri në vitin 1945 ka qenë bullgare, është e pakuptimtë.
Lidhur me qëndrimin bullgar se “gjuha dhe identiteti maqedonas nuk ekzistonin deri më 2 shtator 1944 dhe se krijimi i tyre ishte pjesë e një formimi gjithëpërfshirës të një identiteti të veçantë jo-bullgar me qëllim të ndërprerjes së lidhjeve midis popullsisë lokale dhe Bullgarisë”, Pendarovski tha se “nuk mund të pranojmë diskutime në lidhje me këtë çështje … është e çmenduri”.
Sipas kërkesave bullgare, kur Maqedonia e Veriut do t`i bashkohet BE-së, çdo përmendje e “gjuhës maqedonase” në dokumentet e Bashkimit Evropian do të duhet të shënohet me një yll (fusnotë) që nënkupton se “një gjuhë e tillë ekziston vetëm sipas Kushtetutës së Republikës së Maqedonisë së Veriut”. Përveç kësaj, Sofja thotë se procesi i zgjerimit nuk duhet të legjitimojë inxhinierinë etnike dhe gjuhësore që ka ndodhur gjatë regjimeve të mëparshme autoritare./Alsat
