Javën e fundit të fushatës zgjedhore për rrethin e parë të zgjedhjeve presidenciale, kandidati për president Stevo Pendarovski sot e filloi me takime me banorët e komunës së Shkupit, Saraj dhe Çair.
Duke theksuar se para pesë vitesh kishte premtuar se do të jetë president i të gjithëve, pavarësisht përkatësisë fetare apo kombëtare, Pendarovski tha se të gjithë qytetarët i ndjen si të tijat. Ai ka theksuar se dyert e tij kanë qenë të hapura, pavarësisht nëse kanë ardhur maqedonas, shqiptarë, turq apo qytetarë të etnive të tjera, apo dikush që nuk e ka votuar.
Në këtë drejtim, Pendarovski theksoi se në çdo rast ka qenë me popullin e tij, ka ndihmuar të gjithë dhe kudo dhe ka shtuar se nëse i ndajmë qytetarët në shtet për shkak të përkatësisë etnike dhe për këtë disa kanë privilegje më të mëdha se të tjerët, shteti do të jo vetëm do të ngecë, por edhe do të kthehet prapa dhe nuk do të ketë mbarësi për askënd.
“Nëse vendi nuk ecën përpara, nuk do t’i shihni këta të rinj këtu, që kanë mbetur pas. Ata do të shkojnë atje ku ka një punë më të mirë, do të krijojnë një familje dhe do të jenë më të lumtur. Askush nuk do të na presë 20-30-40 vjet për ta përmirësuar”, tha Pendarovski.
Pendarovski me qytetarët e Sarajit dhe Çairit ndau edhe të arriturat e deritanishme të shtetit në rrafshin ndërkombëtar, mbi të gjitha hyrjen në NATO dhe fillimin e negociatave me Bashkimin Evropian. Procesi i dytë, siç tha ai, do të ishte zhvilluar me ritme edhe më të shpejta, nëse nuk do të kishim përballur një bllokadë të brendshme nga opozita. Duke kërkuar mbështetjen e qytetarëve, Pendarovski theksoi se pasi të bëhemi pjesë e Evropës do të rriten pagat dhe pensionet, e me këtë edhe standardi i jetesës.
Duke bërë paralele mes partisë aktuale në pushtet dhe opozitës, kandidati për president Pendarovski tha se në kohën e tyre nuk kishte demokraci, gjegjësisht burgoseshin për fyerjen më të vogël. Siç theksoi Pendarovski, tani nuk është kështu. Tani çdo person është i lirë të thotë çdo gjë dhe ajo që është më e rëndësishme, nuk ka tensione ndëretnike. “Kjo është arsyeja pse ne kemi detyrë në 24 prill dhe 8 maj të zgjedhim opsionin e duhur, sepse e di që të gjithë jemi të ngopur me ndarjet. Ne kemi nevojë për bashkëjetesë”, ka përfunduar Pendarovski.
