Maqedonia e Veriut është një mik dhe aleat i vlerësuar dhe unë pres që të thellojmë bashkëpunimin tonë në vitet e ardhshme. Urime për përvjetorin e pranimit në NATO. Shtetet e Bashkuara vlerësojnë shumë kontributin e Maqedonisë së Veriut në misionet e NATO-s në Afganistan, Irak dhe Kosovë, tha Sekretari i Mbrojtjes në SHBA, Lloyd Austin në një letër dërguar Ministres së Mbrojtjes Radmilla Shekerinska.
Pas bashkëpunimit të frytshëm 28-vjeçar me Gardën Kombëtare të Vermontit, Sekretari i Mbrojtjes Austin mirëpriti nënshkrimin e Memorandumit të Bashkëpunimit në fushën e Mbrojtjes midis Maqedonisë së Veriut dhe Shteteve të Bashkuara të Amerikës.
“Ky Memorandum do të zgjerojë fushat e bashkëpunimit tonë dypalësh dhe do të jetë një mbështetje për Maqedoninë e Veriut në rrugën për të përmbushur qëllimet e saj siç është zhvillimi i Grupit të Batalionit të Këmbësorisë së Lehtë”, thuhet në letër.
Duke shprehur pritjen për thellimin e bashkëpunimit në vitin 2021 përmes aktiviteteve të tilla si pjesëmarrja amerikane në stërvitjen “Goditja vendimtare 21” organizuar nga vendi ynë, Sekretari i Mbrojtjes vlerëson shumë iniciativën për të zhvilluar Krivoalakun në një terren trajnimi për ushtrime më të mëdha dhe më komplekse, e nga çka do të përfitojnë forcat tona ushtarake, por edhe vendet aleate, si Shtetet e Bashkuara dhe vendet anëtare në NATO.
