Nxënësit në shkollat fillore nga nesër, më 30 mars, nuk duhet të mbajnë më maska gjatë orëve të mësimit, pasi Qeveria sot pranoi rekomandimin e Komisionit për Sëmundjet Infektive, të dorëzuar gati dy javë më parë.
Në fund të javës së kaluar, Shtabi i Përgjithshëm Koordinues për Ballafaqimin me Covid-19 ka pranuar rekomandimet e Komisionit për Sëmundjet Infektive për heqjen e detyrimit për mbajtjen e maskave në shkollat fillore, si dhe rekomandimin për mësimdhënien me prezencë fizike në fakultete.
Siç njoftohet, nxënësit që dëshirojnë, do të mund të mbajnë maska.
Ky vendim nuk vlen për mësuesit dhe personelin tjetër të shkollës. Ata ende do të duhet të mbajnë maska mbrojtëse brenda në shkollë. Detyrimi për të mbajtur maska mbetet për nxënësit e shkollave të mesme dhe studentëve që ndjekin mësimet me prezencë fizike.
