As këtë vit nuk ka datë për konferencën e parë ndër qeveritare midis Maqedonisë së Veriut dhe Shqipërisë me BE-në. Megjithëse Këshilli për Punë të Përgjithshme i BE-së miratoi konkluzionet për zgjerimin e unionit, në to nuk jepen data apo afate konkrete kur Shkupi dhe Tirana do të nisin procesin negociues. Sekretari shtetëror në diplomacinë Sllovene, Gashper Dozhvan tha se me ardhjen e Qeverisë së re në Bullgari, shpresat për të vazhduar negociatat deri në dialog shtohen edhe më tepër.
“Na duhet korniza negociuese të adaptohet. Është një proces i cili do të shpaloset sa më shpejtë të jetë e mundur. Sapo të kemi Qeverinë e re në Bullgari, jemi optimist se do të jetë e mundur vazhdimi i rrugës së gjatë për dialog”- deklaroi Gashper Dozhvan, Sekretar shtetëror në MPJ, Slloveni.
Pavarësisht se përfaqësuesit e BE-së miratimin e konkluzioneve e prezantuan si arritje të madhe, në njëjtën kohë pranuan se për këtë vit ka përfunduar çështja e zgjerimit dhe se do të pritet mundësi e re gjatë vitit 2022.
Nga ana tjetër kryeministri i sapozgjedhur bullgar Kirill Petkov, pas seancës së parë qeveritare në Sofje, tha se në bisedë telefonike me kryeministrin Zoran Zaev, janë dakorduar për formimin e shpejtë të grupeve të punës të cilat do të thurin një plan veprimi deri në fillim të muajit të ardhshëm.
“Ata do të strukturoren sa më shpejt që është e mundur dhe shpresojmë se në fillim të janarit do të kemi plan të qartë se cilat do të jenë ata grupe. Do të inkuadrojmë më shumë kulturë, infrastrukturë, ekonomi, si plotësim përskaj historisë. Duhet të bëjmë plan veprimi dhe në fillim të janarit këto grupe të kenë rezultate reale, të japin ide që të ecim përpara me negociatat me një plan më operativ”- tha Kirill Petkov, kryeministër i Bullgarisë.
Kryeministri Zaev ka telefonuar Petkovin për t’i uruar zgjedhjen e tij kryeministër. Ai thotë se palët janë marrë vesh për intensifikimin e negociatave.
“Ramë dakord të vazhdojmë të punojmë në gjetjen e një zgjidhje të pranueshme për zhbllokimin e procedurës për fillimin e negociatave për anëtarësim të Maqedonisë së Veriut në BE dhe për impuls të ri të përforcimit të marrëdhënieve bilaterale mes dy vendeve, në emër të të ardhmes së përbashkët evropiane.”- pohoi Zoran Zaev, kryeministër
Derisa Maqedonia e Veriut dhe Shqipëria si pako mbeten në vendnumëro, Serbia u shpërblye për siç u tha progresin e arritur dhe hapi një kapitull të ri për ambientin jetësorë. Ndërkohë Mali i Zi u vlerësua për progresin e treguar në bisedime. Të njëjtat konkluzione pritet të konfirmohen edhe nga shefat e shteteve anëtare të cilët do të takohen më datat 16 dhe 17 dhjetor në Samitin e BE-së./Alsat
