Qeveria vendosi në një seancë të jashtëzakonshme që NQP të marrë naftë nga rezervat shtetërore. Bëhet fjalë për rreth 250 ton karburant, që sipas vlerësimeve do të mjaftojë deri në realizimin e prokurimit publik, i cili është paralajmëruar se do të kryhet me procedurë të përshpejtuar dhe negociata pa shpallje. Për të mundësuar këtë, Qeveria shpalli gjendje krize në furnizimin me energji termike.
“Me këtë mundësohet që qytetit të Shkupit t’i jepet hua një pjesë e rezervave shtetërore të naftës. Në këtë mënyrë, Qeveria e zgjidh çështjen e vështirësive të krijuara në punën e ndërmarrjes publike për transport urban,” deklaroi Qeveria.
Kolapsi i NQP erdhi pasi tenderi për furnizim me naftë dështoi dhe 70% e autobusëve mbetën të parkuar në garazhe. Nga Byroja për Prokurime Publike vazhdojnë të këmbëngulin se kanë pasur arsye për anulimin e tenderit.
“Sa i përket procedurës konkrete, kontrolli administrativ konstatoi se organi kontraktues, NAP, ka zgjedhur një ofertë të papranueshme si më të favorshmen. Kjo ofertë, e cila ishte edhe e vetmja e paraqitur në procedurë, nuk përmbushte një kusht të parashikuar në pikën 1.4.8 të dokumentacionit të tenderit. Kjo është konstatuar edhe në raportin e vetë Komisionit të Prokurimit Publik të NQP,” deklaroi Byroja për Prokurime Publike.
Ndërkohë, nga kabineti i kryetares së komunës, Arsovska, më herët akuzuan se arsyeja për anulimin e tenderit është politike dhe se partia në pushtet, VMRO-DPMNE, qëllimisht po krijon krizë duke bllokuar furnizimin me naftë.
Ndërkohë që akuzat politike vazhdojnë, Prokuroria ka njoftuar se janë dhënë udhëzime për të hetuar procedurat për prokurimet publike.
„Janë dhënë udhëzime për Drejtorinë e Policisë Financiare për të hetuar procedurat e prokurimit të mazutit për nevojat e Ndërmarrjes Publike të Transportit Urban ‘Shkup’ (NQP Shkup),“ njoftoi Prokuroria.
Një seancë e jashtëzakonshme është thirrur për këtë pasdite për këshilltarët e qytetit të Shkupit. Kaosi me autobusët ka vazhduar për një kohë të gjatë dhe sot ka kulmuar me një kolaps të plotë të transportit publik.
