Xhelal Neziri, analist nga Maqedonia e Veriut, ka thënë se partia VMRO-DPMNE ka ndryshuar në raport me shqiptarët, pas një reformimi të brendshëm.
Neziri ka thënë në “Interaktiv” të KTV-së se kryetari i kësaj partie, e cila deri vonë është njohur si anti-shqiptare, Hristijan Mickoski, ka pasur takim me krerët e disa prej partive shqiptare, përfshirë këtu të Aleancës për Shqiptarët, Partisë Besa dhe Partisë Alternative, pas dorëheqjes së Zaevit nga posti i kryeministrit dhe kryetarit të partisë.
“Është e vërtetë që ka ndryshuar. VMRO-DMNE në 2018 pati një proces të reformimit të brendshëm, disa fraksione të kësaj partie që njiheshin për retorikën e tyre anti-shqiptare dhe anti-perëndimore u larguan nga kjo parti. Ka pasur kjo parti një reformim gradual, një proces që ka zgjatur dhe vazhdon dhe më tej dhe tani ka arritur ta profilizojë këtë parti si një parti që nuk ka më problem as me shqiptarët dhe as me ndërkombëtarët. Mendoj se kryesia e re ka ndryshuar dhe ka ndryshuar mënyrën se si bëjnë politikë edhe më shqiptarët dhe ndërkombëtarët dhe kjo ka sjellë në situatë që VMRO-DMNE të ketë një kapacitet më të madh koalicionues me partitë shqiptare sesa LSDM-ja”, ka theksuar Neziri.
Ai ka shtuar se Mickoski i ka shfrytëzuar armiqësitë politike mes partive shqiptare duke i bindur dy prej tyre që të shkojë si koalicion parazgjedhor në zgjedhjet lokale të tetorit.
“Lideri i VMRO-DPMNE, Mickoski sonte është takuar në objektin e Parlamentit me disa krerë të partive më të vogla por edhe me partitë shqiptare si përfaqësues të Aleancës për Shqiptarët, të Partisë Besa dhe të Partisë Alternative, për të cilët ai thotë se ka arritur të krijojë një shumicë parlamentare. Paralajmërimet janë se kjo shumicë e re do të kërkojë të votohet mosbesimi ndaj Qeverisë. Nëse ky votëbesim votohet, Qeveria është e obliguar të japë dorëheqje. Kryeministri pritet të japë dorëheqje dhe sipas Kushtetutës, me dorëheqje të kryeministrit bie tërë Qeveria. Kjo është një lojë taktike e Mickoskit”, ka thënë Neziri.
Ndërkaq lidhur me dorëheqjen e Zoran Zaevit nga posti i kryeministrit dhe ai i partisë LSDM, Neziri ka thënë se shumë elemente kanë ndikuar këtu.
“Janë grumbulluar të gjitha elementet nga pak, por shkaku kryesor është mungesa e rezultateve në planin e jashtëm. Zaevi gjithë energjinë e fokusoi në planin e jashtëm. Në arritjen e marrëveshjes me Greqinë, në anëtarësim në NATO dhe targeti i radhës ishte që të fillonin negociatat për anëtarësim në BE, ishte paramenduar që kjo të ndodhte në 2019 menjëherë pas nënshkrimit të marrëveshjes së Prespës”, është shprehur Neziri .
BALLKANI I HAPUR MUND TË JETË PROCES I NJOHJES SË KOSOVËS NGA SERBIA
Neziri, ka thënë se po që se ndryshon partia maqedonase në pushtet, nuk pret që të ketë ndryshim të qëndrimit përkrahës për “Ballkanin e Hapur”. Në Interaktiv të KTV-së ai ka thënë se është i arsyeshëm qëndrimi i Kosovës se Serbia përfiton më së shumti nga kjo iniciativë.
“Është i kuptueshëm edhe vetë pozicionimi i Kosovës ndaj Ballkanit të Hapur. Në kuptimin e tyre është rrezik për Kosovën. Është i arsyeshëm që në bazë të numrave, statistikave, Serbia ka prodhimin më të madh për kokë banori se të gjitha vendet tjera. Megjithatë në një kohë kur BE-ja s’është e gatshme të shkojë tutje dhe kur shtetet e Ballkanit kanë pritur gjatë për integrim, kjo iniciativë megjithatë mund të krijojë atmosferë e frymë evropiane në Ballkan që do të sjellë bashkëpunim në vend të frikës nga njëri-tjetri”, ka thënë ai.
Neziri ka shtuar se nuk pret që Serbia të kërkojë falje tash për krimet e luftës, por ka shprehur besimin që “pranimi i Kosovës nga ana e Serbisë mund të jetë si proces i këtij bashkëpunimi në Ballkanin e Hapur”.
“Me rëndësi është që Kosovës t’i sigurohet status i njëjtë si të gjitha shtetet tjera që ftohen të jenë pjesë e Ballkanit të Hapur dhe ajo do të jetë serioze vetëm nëse përfshihen të gjitha shtetet e të gjitha do t’i zbatojnë zotimet e marrëveshjeve apo akteve që kanë të bëjnë për lehtësim të lëvizjeve”, ka deklaruar ai. “S’besoj që Vuçiqi ndihet i kënaqur që Kosova të ulet si e barabartë me të tjerët. Por nëse ka pranuar të jetë pjesë e kësaj iniciative, duhet të jetë parimore. Nëse pranon që të angazhohet që lëvizja e qytetarëve të jetë pa barriera, pa kufij e pengesa atë duhet ta mbajë edhe në raport me Kosovën. Është platformë e mirë e ndryshimit të qasjes të të gjitha vendeve të Ballkanit”.
