Në Mal të Zi, janë përmbushur kushtet për shpalljen e përfundimit të epidemisë së koronavirusit, deklaroi ndihmësdrejtor i Institutit të Shëndetit Publik, Senad Begiq.
Mali i Zi ka kaluar dy periudha inkubacioni prej 28-ditëve pa raste të reja të të infektuarve me Kovid-19.
“Ekzistojnë kushte epidemiologjike që ISHP të mendojë për përfundim të epidemisë. Kjo është procedurë e përcaktuar me ligj që thotë se një epidemi mund të përfundojë kur të ketë kaluar periudhë të inkubacionit të dyfishtë. Periudha nuk është e përcaktuar me ligj, ajo është më shumë e përcaktuar nga disa rregulla epidemiologjike. Dy inkubacione pa raste të reja dhe me të vërtetë janë përmbushur kushtet për të ç’lajmëruar epideminë”, tha Begiq për Radiotelevizionin Mali i Zi.
Ai theksoi se kjo nuk ndryshon shumë në terren, pasi rreziku i sëmundjes mbetet.
“Fundi i epidemisë nuk do të thotë pothuajse asgjë. Vala e parë është përfunduar fomalisht, por masat dhe urdhrat e Ministrisë dhe rekomandimet e ISHP-së mbeten ende në fuqi. Këto janë distanca fizike, larja e duarve dhe përdorimi i maskave. Në të gjitha vendet e BE-së, mbajtja e maskave është e detyrueshme, si në vendin tonë, gjegjësisht në vende të mbyllura publike, ku nuk mund të mbahet distanca fizike prej dy metrash. Nëse kjo do të mbetet kështu varet nga rrjedha e mëtutjeshme e sëmundjes”, tha Begiq.
Në Mal të Zi gjatë pandemisë, në rreth 620,000 banorë kishte 324 të infektuar me virus dhe dy të vdekur./MIA
