Anëtarët e Komisionit parlamentar për Çështje Evropiane kanë marrë njoftim se pasdite është caktuar seanca e komisionit, në të cilën në rend dite do të jetë propozimi i qeverisë për ndryshimin e Kodit Penal. Propozim-ndryshimet e mbajnë vulën e kryeministrit Dimitar Kovaçevski, ndërsa janë përgatitur nga zëvendësministrja e Drejtësisë dhe Sekretari shtetëror në Ministrinë e Drejtësisë. Madje, këto ndryshime janë dërguar në Parlament me flamur evropian dhe pritet të miratohen shumë shpejtë.
Siç merr vesh gazeta KOHA, në ndryshimet e reja propozohet ulje e dënimit për veprën penale “keqpërdorim i pozitës dhe detyrës zyrtare” dhe për ulje e dënimit për vepër penale “bashkim kriminal”.
Aktualisht Kodi Penal në nenin 353 për veprën “shpërdorim i pozitës dhe autoritetit zyrtar” parashikon:
(1) Me burgim do të dënohet zyrtari i cili duke shfrytëzuar pozitën ose autorizimin e tij zyrtar, me tejkalimin e kufijve të autorizimeve zyrtare ose me moskryerjen e detyrës zyrtare, do të përfitojë ndonjë dobi për vete ose për tjetrin, dënohet nga gjashtë muaj deri në tre vjet burg.
(2) Nëse kryesi i veprës nga paragrafi 1 fiton dobi pasurore më të madhe ose i shkakton dëm pasuror më të madh ose i lëndon rëndë të drejtat e tjetrit, dënohet me burgim prej gjashtë muajsh deri në pesë vjet.
(3) Nëse kryerësi i veprës nga paragrafi 1 fiton dobi të konsiderueshme pasurore ose shkakton dëm të konsiderueshëm, kryerësi dënohet me së paku tre vjet burgim.
(4) Me dënim nga paragrafët 1 dhe 2 do të dënohet edhe personi përgjegjës, personi përgjegjës në personin juridik të huaj, i cili ka përfaqësi ose kryen punë në Republikën e Maqedonisë, ose ai që kryen punë me interes publik, dhe 3, nëse krimi është kryer në kryerjen e autoritetit ose detyrës së tij.
(5) Nëse vepra nga paragrafët (1) dhe (4) është kryer gjatë prokurimit publik ose në dëm të mjeteve nga Buxheti i Republikës së Maqedonisë, nga mjetet publike ose nga mjetet tjera të shtetit, kryesi do të jetë. dënohet me së paku pesë vjet burgim.
ÇFARË SIGUROJNË NDRYSHIMET E PROPOZUARA?
Domethënë, ndryshimi më i rëndësishëm është në paragrafin 3, ku parashihet që kryerësi të dënohet nga 1 deri 4 vite burg, që do të thotë se futet një kufi i sipërm, ndërsa llogaritet edhe vjetërsimi i lëndës.
Në zgjidhjen aktuale ligjore nuk ka kufi të sipërm, por sanksioni është përcaktuar të paktën 3 vjet, që do të thotë se kufiri i sipërm është 20 vjet.
Në lidhje me nenin 394, paragrafi 1, parashikohet: “Kushdo që krijon një grup apo bandë me qëllim të kryerjes së krimeve të dënueshme me burgim prej tre vjetësh ose me dënim më të rëndë, dënohet me burgim prej një deri në dhjetë vjet”.
Me ndryshimet e propozuara ligjore është paraparë që sanksioni i paraparë deri në 10 vjet të reduktohet deri në 3 vjet, ndërsa sanksioni i paraparë deri në 5 vjet në paragrafin 2 të zvogëlohet deri në 2 vjet.
Më fjalë tjera, këto ndryshime nënkuptojnë që zyrtarë të kësaj qeverie që janë dënuar apo gjykohen për vepra penale do të lirohen ose dënohen me dënime minimale, ndërsa do të mbyllen edhe shumë lëndë për ish-zyrtarët e VMRO-së që kanë keqpërdorur detyrat zyrtare duke shkaktuar korrupsion dhe krime tjera.
Dragi Rashkovski dhe Muhamed Zekiri, që të dy ish-Sekretarë të përgjithshëm të Qeverisë dhe të dënuar për vepër penale “shpërdorim të detyrës zyrtare” dhe “korrupsion”, ose do të lirohen ose dënimet e tyre do të ulen ndjeshëm.
Njëjtë pritet të ndodhë edhe Mile Janakievski, Sasho Mijallkov, Gordana Jankullovska…, do t’u ulen dënimet apo edhe do të lirohen nga akuzat. (koha.mk)
