MPB ka njoftuar në lidhje me njoftimet për deklaratat e pretenduara nga autoritetet në Venezuelë se gjatë zgjedhjeve të mbajtura më 28.07.2024 kanë ndodhur sulme të pretenduara hakerimi dhe sulme DDoS nga përdorues të adresave IP maqedonase, Ministria e Brendshme informon publikun se Sektori për Krimin Kompjuterik po ndjek ngjarjet në lidhje me akuzat e pretenduara kundër qytetarëve maqedonas dhe gjithashtu thekson se deri tani nuk janë marrë kërkesa apo informacione në lidhje me ngjarjet e sipërpërmendura nga autoritetet në Venezuelë për kontrolle të mëtejshme nga ana jonë.
Gjithashtu, informojmë publikun se edhe paraqitja e adresave IP maqedonase në një sulm të pretenduar nuk do të thotë se ato burimisht vijnë nga Maqedonia, pra sipas përvojës së deritanishme mund të informojmë se ka një probabilitet të madh që ato të përdorin VPN (Rrjeta Virtuale Private) ose të jenë pjesë e një rrjeti më të madh BotNet, pra të vijnë nga të ashtuquajturat kompjuterë zombie të infektuar, të cilët janë kompromentuar nga hakerët përmes viruseve kompjuterike ose softuerëve të dëmshëm dhe mund të kryejnë detyra të caktuara të kontrolluara në distancë nga individë ose grupe të mundshme hakerash.
Zakonisht, viktima të këtyre kompjuterëve zombie janë persona që nuk e dinë se sistemet e tyre kompjuterike janë të infektuara me softuer të dëmshëm dhe pa dijeninë dhe pëlqimin e tyre kryhen sulme DDoS që përfaqësojnë një përpjekje keqdashëse për të ndërprerë trafikun normal të internetit në serverin, shërbimin ose rrjetin e caktuar për qasje në një objektiv të caktuar në të njëjtën kohë me qëllim të bllokimit, mbingarkimit të tij.”
