Sipas informacioneve nga Drejtoria për Punë Hidrometeorologjike (DPHM), sot pritet mot me diell, por me erë të fortë. Do të fryjë erë e fortë veriperëndimore, veçanërisht përgjatë rajonit të Vardarit dhe në pjesët lindore të vendit, ku shpejtësia e saj do të arrijë deri në 70 kilometra në orë.
Sipas DPHM, temperaturat minimale të mëngjesit sot do të variojnë nga 2°C në Mavrovë deri në 15°C në Gjevgjeli, ndërsa temperaturat maksimale gjatë ditës do të jenë nga 12°C në Mavrovë deri në 21°C në Gjevgjeli. Në Shkup, moti do të jetë me diell dhe me pak vranësira lokale, por me erë të fortë nga veriu.
“Temperatura minimale do të zbresë deri në 10°C, ndërsa ajo maksimale do të arrijë 22°C,” informojnë sinoptikanët.
Sipas parashikimit të DPHM, në dy ditët e ardhshme moti do të jetë me diell, me temperatura të ulëta në mëngjes që do të rriten gjatë ditës. Nga e enjtja priten reshje të reja shiu, që në disa pjesë të shtetit do të jenë më të dendura.
