Kreu i PSD-së, Dardan Molliqaj, i ka reaguar imamit Shefqet Krasniqi për deklaratën e tij seksiste ndaj grave.
Molliqaj me anë të një postimi në Facebook ka thënë se ky rol i Krasniqit nuk ësht i denjë për besimtarët, dhe se sipas tij pozicioni i Krasniqit është reaksionar, shkruan lajmi.net.
Madje sipas Molliqajt, Imami Krasniqi nuk e ka vendin në televizion, dhe është problematik fakti se si atij i jepet hapësirë mediatike.
“Krasniqi duhet ta kuptojë që nëse është një vend i caktuar dhe i sanksionuar atëherë është ai i fesë në raport me shtetin. Kosova është vend sekular dhe kjo është njëra ndër vlerat që duhet kultivuar. Solidariteti duhet të jetë pikënisje dhe vlerë e përbashkët. Por nëse nuk reagojmë ndaj hoxhës në fjalë është qartë se nuk do të mobilizohemi as ndaj pushtetit “Krejt dhe drejt””, ka shkruar ai.
Postimi i plotë:
Hoxha e ka vendin në xhami
Hoxhë Shefqet Krasniqi, në njërin nga emisionet qendrore, mbajti ders për rolin e gruas e burrit dhe për mjedisin ku ata takojnë për nga lloji. Roli që ai merr nuk është i denjë as për besimtaret/ët. Pozicioni i tij është reaksionar. Ky hoxhë nuk e ka vendin në television. Po aq problem është hapësira mediatike që i është dhënë. Duhet ta kemi në vëmendje që është patriarkati ai që po i fuqizon këta zëra.
Rendi patriarkal është i shtrirë në të gjitha strukturat shoqërore, nga politika dhe ekonomia shfrytëzuese neoliberale, deri tek arsimi e kultura stereotipizuese e mizogjene. Por nëse i kemi shpallur luftë rendit patriarkal, duhet denocuar secilin eksponent të tij. Reagimet për Ardian Kastratin i cili e vazhdoi historinë e moçme të diskutimit për gratë nisur nga trupi me një retorikë e cila kur ndërvepron me kontekst prodhon gjuhë seksiste, ishin me vrull e zell, por shohim reagim të vakët, sporadik, për Shefqet Krasniqin, që ka ndikim shumë herë më të madh në shoqëri. Ky i fundit e trajton gruan si instrument riprodhimi shoqëror dhe në shërbim të burrit. Ai objektifikon dhe dehumanizon. Gjuha e tij robëron.
Krasniqi duhet ta kuptojë që nëse është një vend i caktuar dhe i sanksionuar atëherë është ai i fesë në raport me shtetin. Kosova është vend sekular dhe kjo është njëra ndër vlerat që duhet kultivuar. Solidariteti duhet të jetë pikënisje dhe vlerë e përbashkët. Por nëse nuk reagojmë ndaj hoxhës në fjalë është qartë se nuk do të mobilizohemi as ndaj pushtetit “Krejt dhe drejt”.
Gratë kanë luftuar dhe kanë rrënuar mure që ndajnë ato prej hapësirës publike, duke e kthyer vëmendjen edhe tek sfera private, e cila është çështje që formësohet nga politika dhe e ndikon atë. Kjo nuk është luftë e përfunduar, sikur që nuk kanë përfunduar betejat për barazi, mirëpo angazhimi për një të përbashkët universale, na takon secilit e secilës, çdo ditë e pa dallime. Nuk do të lejojmë që asnjë instance, autoritet fetar e politik t’i kornizojë e udhëzojë njerëzit sipas besimeve fetare dhe ideologjike. Lufta për liri dhe barazi është permanente.
