Mads Gilbert, nga Bordi Norvegjez i Ndihmës, foli për Newshour të BBC-së nga Egjipti, ku ai është në pritje të hyrjes në Gaza. Ai tha se kolegët e tij në Gaza i kishin përshkruar tmerret atje çdo ditë.
“Imagjinoni një spital me 5,000 deri në 15,000 refugjatë civilë, të stërmbushur me pacientë që kanë nevojë për operacion dhe më pas dritat fiken. Mendoj se mund ta imagjinoni sa e vështirë është kjo”, tha ai.
Dhjetra njerëz janë plagosur rëndë si rezultat i bombardimeve izraelite, tha ai, dhe stresi i situatës po i dërgon gratë shtatzëna në lindje të parakohshme. Sfidat janë ende përpara, shtoi ai, pasi qasja e kufizuar në ujë të pastër dhe ushqim mund të shkaktojë shpërthime të mëdha sëmundjesh.
Brenda spitaleve, pajisjet kryesore si ventilatorët, monitorët, pompat e infuzionit dhe inkubatorët neonatal janë pa energji elektrike. Ai gjithashtu përshkroi shikimin e një videoje të dërguar nga një mjek në Gaza – që tregonte një mjek tjetër të gjunjëzuar jashtë një spitali, i tronditur pasi mësoi se e gjithë familja e tij ishte vrarë.
Dr Gilbert tha se stafi mjekësor në një farë mënyre po përpiqej të bënte punën e tij ndërsa luftonte me frikën për familjet e tyre dhe pikëllimin për anëtarët e rënë të familjes ose miqtë. Duke iu referuar eposit të famshëm italian për Ferrin, ai shtoi: “Situata në Gaza e bën Ferrin e Dantes të duket si argëtim”.
