VLEN-i e ka konfirmuar legjitimitetin te votuesit shqiptarë dhe vlerësoj se ata do të jenë partner të koalicionit qeveritar, ka deklaruar lideri i VMRO-DPMNE-së, Hristijan Mickoski.
“Me rezultatin në zgjedhje vlerësoj se ata e kanë konfirmuar legjitimitetin e tyre dhe vlerësoj se se ata do të jenë partner në Qeverinë e ardhshme që do ta udhëheqë koalicioni “Maqedonia jote” dhe unë si mandatar”, tha Mickoski.
Shtoi se “me BDI-në nuk kemi pikë të përbashkët”.
Këtë e arsyetoi edhe duke thënë se koalicioni i BDI-së ka në përbërje komunitete, të cilat tashmë janë pjesë edhe të koalicionit të VMRO-DPMNE-së.
“Në koalicion (Fronti Europian) kanë parti të tjera. Ata janë pjesë dhe të komuniteteve jo shumicë që janë pjesë edhe të koalicionit tonë. Kemi dy parti që janë përfaqësues të boshnjakëve, vllahët, romët… Në tërë këtë mozaik, përfaqësuesi i vërtetë i komunitetit shqiptar është koalicioni VLEN dhe kjo duhet të respektohet”, tha Mickoski dhe shtoi se votimi prej badenteri do të arrihet dhe pa BDI-në.
