Kryeministri Hristijan Mickoski paralajmëroi një aksion të fuqishëm kundër gjyqtarëve dhe prokurorëve të korruptuar, me të cilët, siç tha ai, nëse duhet do të përballen edhe në mënyra të tjera.
Këtë e tha duke iu përgjigjur një pyetjeje të gazetarëve lidhur me kryetaren e Këshillit Gjyqësor, Vesna Dameva, duke theksuar se për sa kohë që këta persona janë të pranishëm në prokurori dhe gjyqësor, vendi nuk do të bëjë asnjë hap përpara në luftën kundër krimit dhe korrupsionit.
“Unë e kam thënë këtë për një kohë të gjatë dhe e kuptoj pse qytetarët thonë: është mirë, po punoni, po bëni këtë, po bëni atë, etj., por aspak nuk po merreni me krimin dhe korrupsionin, dhe i kuptoj. Për sa kohë që këta njerëz janë ende të pranishëm në prokurori dhe gjyqësor, për fat të keq, ne nuk mund të bëjmë asnjë hap përpara në luftën kundër krimit dhe korrupsionit dhe hijeve të së kaluarës, të cilat janë pjesë e asaj kënete politike që ka kapur prokurorinë dhe gjyqësorin,” tha Mickoski.
Duke folur për këtë temë, ai shtoi se në çdo mbledhje të Qeverisë lexohen raportet e auditorëve dhe pyetet drejtpërdrejt auditori shtetëror nëse ka bazë për vepra penale dhe nëse këto janë dorëzuar në prokurori.
“Dhe në çdo mbledhje të Qeverisë marr të njëjtën përgjigje: ‘Po, është dorëzuar’. Kjo do të thotë se kemi qindra raste të dorëzuara në prokurori. A keni dëgjuar ndonjëherë, përveç rasteve kur ndonjë prokuror duhet të nënshkruajë një urdhër arresti apo kontrolli dhe i është përkeqësuar gjendja, ka marrë diarre, vështirësi në frymëmarrje, temperaturë të lartë, etj.? Ata gjithmonë gjejnë një mënyrë për të penguar aksionet e organeve të ndjekjes.
Unë jam shumë i zhgënjyer nga kjo që po ndodh sot, por më besoni se nuk do të jem për shumë gjatë. Do të hyjmë në një aksion të fuqishëm dhe, nëse duhet, me ata gjyqtarë dhe prokurorë të korruptuar do të përballemi edhe në mënyra të tjera,” deklaroi kryeministri Mickoski.
