Franca të Shtunën tha se po tërhiqte të dërguarin e saj në Turqi për konsultime pas komenteve nga Presidenti turk Rexhep Tajip Erdogan i cili sugjeronte që homologu francez Emmanuel Macron kishte nevojë për një kontroll të shëndetit mendor.
Franca dhe aleati i saj i NATO-s janë në mosmarrëveshje për një sërë çështjesh, përfshirë të drejtat detare në Mesdheun lindor, Libinë, Sirinë dhe konfliktin e përshkallëzuar midis Armenisë dhe Azerbajxhanit për Nagorni-Karabakun.
Por Ankaraja tani është ndezur, veçanërisht nga një fushatë e mbështetur nga Macron, për të mbrojtur vlerat laike të Francës kundër Islamit radikal, një debat i dhënë për të cilin ndikoi edhe më tepër vrsja këtë muaj e një mësuesi që i tregoi klasës së tij një karikaturë të profetit Muhamed.
“Çfarë mund të thuhet për një kryetar shteti që trajton miliona anëtarë nga grupe të ndryshme besimi në këtë mënyrë: së pari, të bëjë kontrolle mendore,” tha Erdogan në një fjalim televiziv.
“Cili është problemi i individit të quajtur Macron me Islamin dhe me muslimanët?” pyeti Erdogan.
“Macron ka nevojë për trajtim mendor,” shtoi Erdogan, ndërsa tregoi se ai nuk priste që udhëheqësi francez të fitonte një mandat të ri në zgjedhjet e 2022.
Në një lëvizje jashtëzakonisht të pazakontë, një zyrtar presidencial francez tha se ambasadori francez në Turqi po tërhiqej nga Ankaraja për konsultime, dhe do të takohej me Macron për të diskutuar situatën pas shpërthimit të Erdogan.
“Komentet e Presidentit Erdogan janë të papranueshme. Tepricat dhe vrazhdësia nuk janë të denja. Ne kërkojmë që Erdogan të ndryshojë rrjedhën e politikës së tij sepse është e rrezikshme në çdo aspekt,” i tha zyrtari AFP.
Zyrtari i Elysee, i cili kërkoi të mos përmendej me emër, tha gjithashtu se Franca kishte vërejtur “mungesën e mesazheve të ngushëllimit dhe mbështetjes” nga presidenti turk pas prerjes së kokës së mësuesit Samuel Paty jashtë Parisit.
Zyrtari shprehu gjithashtu shqetësim në lidhje me thirrjet nga Ankaraja për bojkot të mallrave franceze.
Macron këtë muaj e përshkroi Islamin si një fe “në krizë” në të gjithë botën, dhe tha se qeveria do të paraqiste një projekt-ligj në dhjetor, për të forcuar një ligj të vitit 1905, që ndau zyrtarisht kishën dhe shtetin në Francë.
Ai njoftoi mbikëqyrje më të rreptë të shkollimit dhe kontroll më të mirë mbi financimin e huaj të xhamive.
