Kapitull i ri i ndarjes së Tottit nga Ilary Blasi. Mes llogarive të supozuara të fshehura, jetës shoqërore, shpenzimeve të çmendura dhe një serie akuzash të ndërsjella, Ilary kthehet në “artileri të rëndë”. Sipas “La Verità”, marrëdhënia mes të dyve është në nivelin më të ulët historik dhe ndoshta çeku prej 12.500 eurosh që ish-kapiteni i Romës firmos çdo muaj për fëmijët dhe ish-gruan e tij është “pikëtakimi” i vetëm.
Mësohet se Ilary Blasi ka zbuluar sekrete të financave të ish-bashkëshortit të saj, duke e akuzuar atë se ka shpërdoruar shuma të mëdha parash në kazino. Prezantuesja, përmes avokatëve të saj, ka treguar se ish-kapiteni verdhekuq ‘djeg’ mesatarisht në kazino shuma të barabarta sa 6.5 herë më shumë se sa u jep fëmijëve. Flitet për një periudhë 3-vjeçare gjatë së cilës janë bërë transferta në kazino “Monte Carlo” për një shumë totale prej 3 milionë e 324 mijë eurosh.
Para, theksojnë avokatët e Blasit, të cilat duhet të ishin përdorur për të mbajtur familjen, por në vend të kësaj u shpërdoruan në vorbullën e lojërave të fatit. Sipas avokatëve të ish-gruas, Totti gjithashtu nuk arriti të dokumentojë disa llogari, përfshirë atë në Singapor, tek autoritetet gjyqësore. Po kështu, duket se ish-kapiteni verdhekuq ka lënë pas dore edhe përgjegjësitë e tij si prind, duke e lënë të vetme vajzën e tij, Isabela, vetëm 7 vjeçe, në një hotel teksa merrte pjesë në një event.
Çështja ekonomike do të ishte vendimtare në përcaktimin e ndihmës për mbajtjen e fëmijëve dhe kërkon një analizë të saktë të pasurisë së të dy prindërve. Sipas asaj që është raportuar, burimet financiare të Ilary Blasit rezultuan shumë më të konsiderueshme nga sa dukej. Sipas avokatëve të ish-bashkëshortit të saj, prezantuesja e “Mediaset” kishte likuiditet të konsiderueshëm në llogaritë e saj rrjedhëse.
Vetëm për filmin dokumentar të “Unica” flitet për një fitim prej 700 mijë eurosh, të cilit duhet t’i shtohen edhe kompanitë e ndryshme me të cilat ajo lidhet, mes të cilave edhe “Number 5 Srl”, që menaxhohet nga babai i saj, Roberto Blasi. Nëse kjo hipotezë do të konfirmohej, atëherë mund të shkohet në ulje të ndjeshme të pagesës mujore prej 12.500 eurosh që Totti i paguan Blasit (rregullisht, avokatët e babait janë të prirur ta vënë në dukje); një shifër që megjithatë përjashton djalin e tyre të madh, Cristian, i cili luan në Spanjë dhe tashmë është i pavarur ekonomikisht.
Nuk është sekret që ish-kapitenit të Romës i pëlqejnë lojërat e fatit. Megjithatë, shumat në fjalë do të ishin shumë më të vogla. Mirëpo, lidhur me akuzën se e ka lënë vetëm në një hotel vajzën e tij Isabelën, argumentohet se nëse kjo do të kishte ndodhur realisht, ai do të kishte marrë një ankesë për braktisje të fëmijës. E cila nuk ndodhi kurrë.
Ndërkohë, çështja e ndarjes po ecën me shpejtësi. Gjyqtari ka caktuar seancën e radhës për datën 31 maj 2024. Çështja e parë që do të trajtohet do të jetë ajo e akuzës. Megjithatë, për aspekte thjesht ekonomike, do të pasojnë data të tjera. Për momentin, konsulenca teknike dhe kontabël nuk është marrë ende në konsideratë, do të diskutohet vetëm në fund të vitit, nëse jo edhe në vitin 2025.
