Filozofi Blerim Latifi ka komentuar edhe një herë deklaratën e hoxhës Shefqet Krasniqi i cili tha se gratë e kanë vendin në kuzhinë ndërsa burrat në odë, transmeton Gazeta Metro.
Blerim Latifi në T7 tha se është shqetësuese që reagimet për deklarata të tilla kanë filluar të jenë selektive.
Ai tha se Shefqet Krasniqi është shkolluar në një vend ku ende diskutohet nëse gruaja ka të drejtë të vozitë veturë apo jo.
“Sheqet Krasniqi është shkollu në Arabinë Saudite, një shoqëri e cila deri në vitin 1962 e ka pasë të legalizume skllavërinë, një shoqëri ku ende diskutohen banalitete të tilla se a duhet femra me vozitë apo jo. Ai është shkollu atje, e drejtë e tij është me u shkollu. Ai mendon që standardet morale, kulturore e politike që vlejnë në Arabi Saudite duhet të vlejnë kudo”, tha Latifi.
Sipas tij një teolog që nuk e kupton etosin e shoqërisë moderne ai definitivisht ka probleme serioze.
Reagime të ashpra ka pasur gjatë ditës së sotme ndaj Shefqet Krasniqit, në lidhje me deklaratën e tij kundër grave.
