Një djalë njëzetvjeçar ka humbur jetën nga gjakderdhja në rrugë në Krushevac pasi ishte therur me thikë, dhe dyshohet se është sulmuar nga vetë babai i tij, pas çka ky i fundit ka kryer vetëvrasje. Rasti u zbulua pasi në polici u raportua se një i ri i përgjakur po ecte nëpër rrugë. Siç shkruajnë mediat serbe, qytetarë të frikësuar kanë thirrur dhe raportuar se një i ri, i mbuluar në gjak, po ecte nëpër rrugë. Një patrullë policie doli menjëherë në vendngjarje, por e gjeti të riun e pafat të shtrirë në beton, pa shenja jete. Pas kësaj, patrulla policore u drejtua drejt shtëpisë së të riut, ku jozyrtarisht është gjetur edhe trupi i një burri, i cili është babai i të vrarit. Sipas mediave të Beogradit, me shumë gjasë bëhet fjalë për një vrasje dhe vetëvrasje. Sipas disa mediave, vrasjes i ka paraprirë një debat. Thuhet se babai e ka sulmuar djalin me thikë në shtëpinë familjare, dhe pas plagëve të marra, i riu i plagosur ka ikur dhe ka humbur jetën nga gjakderdhja në rrugë. Policia dhe prokuroria kanë kryer hetime. Trupat janë dërguar menjëherë për autopsi për të përcaktuar shkakun e vdekjes.
