Komisioni për Parandalimin dhe Mbrojtjen nga Diskriminimi (KPMD) ka iniciuar procedurë për mbrojtje nga diskriminimi të grupit fetar “Lev Tahor”, përcjell Telegrafi Maqedoni.
Rasti, sipas Komisionit, zhvillohet në bazë të origjinës, fesë dhe besimit në fushën e qasjes në mallra dhe shërbime.
Nga Komisioni thonë se tashmë kishte inspektuar dhe takuar një përfaqësues të grupit “Lev Tahor”, duke identifikuar disa shkelje të Ligjit për Parandalimin dhe Mbrojtjen nga Diskriminimi.
“KPMD do t’u dërgojë një kërkesë për deklaratë diskriminuesve të mundshëm dhe në këtë mënyrë do t’ua kalojë barrën e provës këtyre personave. Në rast se diskriminuesit e mundshëm nuk dëshmojnë të kundërtën, KPMD do të konstatojë diskriminimin dhe nëse nuk zbatohen rekomandimet do të iniciojë procedurë kundërvajtëse në gjykatën kompetente”, thuhet në komunikatë.
KPMD, siç thuhet në njoftim, ka përcjellë raportimet e mediave, si dhe deklaratat e organizatave joqeveritare për ngjarjet në Kumanovë, ndërsa pas kontrollit ka konstatuar se nuk ka pasur sulm fizik nga qytetarët kundër grupit, por informacioni që u përhap në media ka qenë i rremë.
Komisioni vlerëson se media të caktuara duhet të bëjnë hulumtimin e tyre para publikimit të lajmit, me çka do të parandalohet përhapja e lajmeve të rreme për natyrën e grupit dhe ngjarjet në Kumanovë. Komisioni thekson se informacioni i paverifikuar shkakton dëme shtesë për grupin, dezinformon publikun dhe forcon praktikat diskriminuese në shoqërinë tonë.
