Banorët e Pekinit të hënën filluan të blejnë ushqime dhe produkte për nevoja ditore, ndërsa qyteti u alarmua pasi gjatë fundjavës 10 nxënës të shkollave të mesme rezultuan pozitivë për COVID-19. Zyrtarët e qytetit pezulluan mësimin në shkollë për një javë pas rezultateve pozitive të testit.
Kryeqyteti kinez raportoi gjithashtu 14 raste të reja të konfirmuara lokale dhe pesë raste të reja lokale asimptomatike gjatë periudhës së fundit 24-orëshe deri në mesnatë. Radhë të gjata u panë në supermarketet në qendër të qytetit, pasi blerësit këputnin oriz, petë, perime dhe produkte të tjera, ndërsa punëtorët e dyqaneve rimbushnin me nxitim disa rafte bosh.
Një grua, e cila i dha vetëm mbiemrin Zhang, mbante dy çanta plot me perime, vezë dhe petë të ngrira. Ajo tha se donte të blinte vetëm “pak” më shumë se zakonisht, mjaftueshëm për të zgjatur rreth një javë, për familjen e saj prej dy anëtarësh.
“Ne kemi frikë nëse shërbimi logjistik ndërpritet, furnizimet nuk do të plotësojnë kërkesat tona”, ka thënë Zhang, qytetare. Liang, baba i një vajze dyvjeçare, tha se nuk shqetësohej se Pekini do t’i nënshtrohej ndonjë bllokimi, por tha se nevojiten masa paraprake për familjen e tij.
“Unë nuk jam i shqetësuar. Familja ime më kërkoi të rezervoja, kështu që unë e bëra këtë. Në fund të fundit kemi një fëmijë”, ka thënë Liang, qytetar. Në një supermarket tjetër, pjesë të seksionit të mishit ishin zbrazur.
“Ne nuk menduam se çfarë të rezervonim, vetëm shpresoj se nuk do të jetë si në Shangai. Ne i hamë këto rregullisht gjithsesi”, ka thënë një qytetar. Kina ka dyfishuar politikën e rreptë “zero-COVID” edhe përballë variantit shumë të transmetueshëm, Omikron.
