Ish kryetari i komunës së Skenderajt, Bekim Jashari, ka reaguar sot lidhur me zhvillimet në veri, ndërsa theksoi se shtetin tonë nuk mund të kërcënojë dhe as cenojë askush nga Serbia. Jashari në një postim në Facebook shkruan se barrikadat në veri duhet të largohen menjëherë dhe qytetarët atje nuk duhet të vazhdojnë të mbahen peng nga politika e Beogradit. Ish kryetari i komunës së Skenderajt thekson se në gjithë këtë rrugë, jetike mbetet unifikimi i spektrit politik në vend për të përmbyllur këtë kapitull, në koordinim të plotë me SHBA-të dhe shtetet e Evropës e botës demokratike.
“Republika e Kosovës si shtet i pavarur, është ndërtuar mbi parimet demokratike që sigurojnë liri dhe të drejta të plota për secilin qytetar të saj, pa dallim. Veprimet e fundit të shtetit tonë, policisë së shtetit nuk duhet të shikohen e gjykohen ndryshe pos si zbatim i detyrave të përcaktuara nga kushtetuta jonë e të njohura edhe me konventa ndërkombëtare. Shtrirja e sovranitetit shtetëror në çdo cep të territorit është obligim që duhet realizuar medoemos”, shkruan Jashari. Ai më tej thotë se si shtet i ri, nga negociatat e shumta janë kemi bërë kompromise të dhimbshme në emër të ruajtjes së paqes, stabilitetit rajonal dhe miqësisë ndërkombëtare.
“Me të drejtat që ua kemi garantuar me kushtetutë komuniteteve pakicë, kemi dhënë shembull në Evropë dhe botë sa i përket respektimit të lirive dhe të drejtave në shkollim, punësim, pjesëmarrje në qeverisje etj. Pra kemi dhënë aq shumë në luftë dhe në paqe, e po ashtu edhe në tavolinë në negociata e bisedime dhe tani e vetmja gjë që duhet bërë është ofrimi i sigurisë për banorët në veri dhe zhvillimi i kësaj pjese të vendit nëpërmjet punësimit dhe krijimit të perspektivës për të gjithë pa dallim”, shkruan ai.
Sipas Jasharit, njëkohësisht Evropa dhe mekanizmat tjerë ndërkombëtar duhet të shohin politikën destruktive të Beogradit dhe të merren seriozisht me kërcënimet e Serbisë dhe atyre që ende jetojnë me iluzione e propaganda të Millosheviqit të cilat rrezikojnë stabilitetin e Ballkanit dhe me gjerë.
“Barrikadat në veri duhet të largohen menjëherë, qytetarët atje nuk duhet të vazhdojnë të mbahen peng nga politika e Beogradit. Shtetin tonë nuk mund të kërcënojë dhe as cenojë askush nga Serbia, ne jemi të gatshëm si shtet por edhe si shoqëri që t’i dalim zot vendit tonë, në jetësim të amanetit të heronjve, dëshmorëve e martirëve të lirisë. Krenar me Policinë tonë që pavarësisht rrethanave qëndrojnë në shërbim të shtetit dhe sigurisë së qytetarëve të Kosovës”, shkruan ndër të tjera isha kryetari i Skenderajt.
