Klinika Infektive, e Qendrës Klinike Universitare të Kosovës, ka njoftuar se një ditë më parë aty ka vdekur një pacient 70-vjeçar me koronavirus.
Viktima është thënë se ka qenë nga Komuna e Vushtrisë dhe ka pasur edhe sëmundje tjera shoqëruese.
Ndërkohë gjatë ditës së hënë në këtë Klinikë janë duke u trajtuar 97 pacientë, prej tyre 93 të infektuar me koronavirus.
Sipas zyrtarëve të Klinikës, pesë pacientë janë në gjendje kritike, derisa 41 pacientë janë duke u trajtuar me oksigjenoterapi dhe përkujdesje intensive.
Marrë parasysh të dhënat e fundit, që prej shfaqjes së rasteve të para me koronavirus në Kosovë më 13 mars dhe deri më tani, janë regjistruar 2,169 raste me sëmundjen Covid-19, që shkakton koronavirusi.
Prej tyre, 1,047, persona janë shëruar, derisa 37 pacientë kanë vdekur.
