Pas aksidenteve rrugore, dhuna në familje është bërë një nga problemet më të mëdha në Shqipëri, me raste të shpeshta që kanë përfunduar edhe në tragjedi. Një ngjarje e rëndë ka ndodhur në një familje në Libohovë, me policinë që njofton se babai ka sulmuar me thikë të bijën.
Policia ka arrestuar kryefamiljarin Piro Bane, 68 vjeç.
“Arrestimi i këtij shtetasi u bë pasi në banesën e tij, ka ushtruar dhunë fizike dhe psikologjike si dhe ka goditur me mjet prerës vajzën e tij 30-vjeçare”, sqaron policia.
Ndërkohë një ngjarje me kontekst të ngjashëm ka ndodhur edhe në Durrës, ku policia ka arrestuar 39-vjeçarin Fatbardh Muçka, pasi ka kanosur më armë zjarri automatik babain e tij, shtetasin S.M. 71 vjeç.
Në cilësinë e provës materiale u bllokua arma e zjarrit tip automatik, model 56. Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale ” Dhunë në familje”dhe ” Prodhimi dhe mbajtja pa leje e armëve luftarake dhe e municionit”parashikuar në nenet 130/a/1 dhe 278/2 të Kodit Penal.
