“Ishte spontane dhe jo e detyruar. Në ato muaj më dhanë një Kuran dhe falë rrëmbyesve të mi mësova edhe pak arabisht”, tha humanistja italiane, Silvia Constanza Romano
Punonjësja e shpëtuar humanitare italiane, Silvia Constanza Romano, e cila ka pranuar Islamin thotë se është konvertuar me vullnetin e saj dhe jo me forcë.
Romano, 25 vjeçare, ishte rrëmbyer në qytetin juglindor bregdetar të Kenias, Chakama në nëntor të vitit 2018.
Ajo u shpëtua të dielën përmes përpjekjeve të përbashkëta nga shërbimet e inteligjencës turke, somaleze dhe italiane.
“Ata më siguruan se nuk do të vritesha dhe ashtu ndodhi”, i tha Romano agjencisë italiane të lajmeve ANSA.
Në konvertimin e saj në Islam, Silvia tha se kjo ndodhi derisa ishte peng.
“Ishte spontane dhe jo e detyruar. Në ato muaj më dhanë një Kuran dhe falë rrëmbyesve të mi mësova edhe pak arabisht”, tha ajo.
“Ata më shpjeguan arsyet dhe kulturën e tyre. Procesi im i konvertimit ka qenë i ngadaltë në muajt e fundit. Nuk ka pasur martesë apo lidhje, vetëm respekt”.
Zëvendësministrja e Jashtme e Italisë pranoi bashkëpunimin turk gjatë operacionit të shpëtimit.
“Ka pasur bashkëpunim me shërbimin e inteligjencës turke për ta lokalizuar dhe ndërmarrë veprime në kohën e duhur”, tha për kanalin televiziv LA7, Marina Sereni.
